Shillong, ïaïong : U Bah Michael Kharsyntiew ha ka sngi Thohdieng u la plie paidbah ïa ka Nursing Room jong ka Ruprekha High School kaba don ha Lawmali, Shillong bad ha kajuh ka por u la noh synñiang ruh da ka pisa na ka bynta ban shna pynbha ïa ka kamra Principal bad ïa ka ophis jong kane ka skul.
Ha kane ka sngi, la sakhi lang da u President jong ka Assomia Namghar Ruprekha u Dwarka Singhania, ka dkhot jong ka School Management kaba dei ruh ka Principal jong ka English Section ka Kong S. Pde. U Principal jong ka Hindi Section u Mr Binod Kumar bad kiwei kiwei.
ïa ka Ruprekha kaba la long kawei na ki skul ba la rim tam ha kane ka jylla, la seng ha u snem 1964 bad kane ka skul kaba la don naduh ka kyrdan Lower Primary haduh Secondary ka dei kaba shu ioh jingïarap na ki riew shimet bad na ki jingïarap jong ka Sorkar.
Nalor kata, kane ka skul ka don ruh ka skul miet ba la buh khnang na ka bynta ki khynnah kiba leit bylla mynsngi bad kumjuh ruh na ka bynta kito kiba wan na ki longïing kiba kham duna ka ïoh ka kot hynrei kiba angnud pat ban dup nang ïa ka thoh ka pule.
