Shillong Iaiong 29: U Symbud Myntri Rangbah ka jylla u Bah Prestone Tynsong u la pyntip ba u la iakynduh ia Myntri ka Sorkar Pdeng uba khmih ia ka tnad bording u RK Singh ha kaba u la kular ban pyllait noh ia ka pisa kaba dang sah jong ka MeECL kaba long T.192 klur bad ban mang T.1100 klur tam ban pyntreikam iaka skhim RDSS.
U la ong, ba ka sorkar jylla kala ioh ruh ia ka jingmynjur naka sorkar pdeng ban pyntrei iaka projek RDSS na ka bynta ban pynbha bad pynthymmai iaka tnad Distribution haka jylla Meghalaya kaba kot sha ka T.1100 klur tam bad kawei kadei naka bynta ban pyntreikam ia ki Smart Meter, ban buh shuh shuh ia ki Transformer bad ia ki waïar light ha ki shnong ki thaw jong ka jylla bad ban pynbit pynbiang ia ka rukom sam iaka bording elektrik.
“Ka sorkar pdeng kala mynjur ban mang T.1100 klur tam ban pyntreikam ia katei ka projek ha ka jylla bad nga kyrmen skhem ba ynda la dep pyntreikam kan long ka jingkyrkhu bad ka jingmyntoi ia ka jylla ha kaba iadei bad ka bording elektrik bad khamtam eh haba ngi kwah katba lah ban pynduna iaka jingduhnong bad kumta baroh kawei pa kawei ka longing kaba don ha ka jylla kiba don kumba 7 lak tam, yn sa pyndait noh da ki Smart Meter ha kaba ki lah ban leh daka Pre Paid ne Post Paid kaban iasyriem thik kumba siew ia ka Bill Mobile Phone ha kaba kin sa ioh jingtip ba kidei ban siew iaka bai bording ka jongki” ong u Bah Prestone Tynsong u ba khmih ruh iaka tnad Bording.
U la ong, ha ki snem kiba la dep, ki paidbah ka jylla kila shem jingeh namar ki Meter Reader ki leit shi sien ar bnai ne lai bnai bad ki nongshong shnong khamtam ki longing kiba duk ki shem jynjar namar ba ki hap ban siew shisien siew iaka bai bording haduh 4 ne 5 bnai, hynrei ban pynsuk ia ki paidbah yn buh da ki Smart Meter.
U la iathuh, ba u Myntri ka Sorkar Pdeng u la pynpaw ba dei ban leh kloi ha kaban pyndait ia ki Smart Meter namar mynta la ioh ia ka jingbhah tyngka na ka bynta ki 4 lak 60 hajar ïing bad la buh ia ka thong ba dei ban pyndep hapoh shi snem shiteng bad kumta ka jingduhnong jong ka MeECL kan duna noh bad kan pynsuk ruh ia ki paidbah kiba pyndonkam iaka bording elektrik bad kan ym don shuh ka jingkynnoh ba ka MeECL kala pulom ha kaban ai iaka Bill ne bai bording.
U Bah Prestone u la ong, ba u la dep ban bthah iaka MeECL ba kadei ban pynlong iaka prokram ban leit ai jingpynshai ha kylleng ki shnong ki thaw ba ki nsngewthuh iaka jingmyntoi lyngba u Smart Meter bad shen yn sa sdang noh ia kane ka prokram da kaba iatreilang bad ki bor pyniaid shnong kiba don haka jylla ban ym don shuh kano kano ka jingartatien nangne shakhmat.
“U Smart Meter u ban pyndait ha ka jylla jong ngi, la ka long ha Sor ne Nongkyndong yn dei uban ai ei sha ki longiing longsem bad ym donkam ban siew pisa eiei bad ngin sa khmih bniah ia kiei kiei baroh ba kan long ha ka lynti kaba bit ba biang khnang ba ki paidbah kin ym don shuh kano kano ka jingujor” ong u Bah Prestone Tynsong.
“Ngi pynbiang ruh ia ki kor ki bor haka jingpoi ia ka bording da kaba buh shuh shuh ia ki Sub Station ha kylleng ki jaka jong ka jylla jong ngi ban pynsuk ia ki paidbah khnang ba ka kynrum kynram haka jingduh iaka bording elektrik kan jah noh syndon. Ngi la phah iaka jingtyrwa kaban kot shaduh T.650 ne T.700 klur ha kaba iadei bad kane ka bynta bad ngi kyrmen skhem ba ha ki snem ban wan ngin lah ban pyndep ia kane ka jingangnud jong ka sorkar bad baroh ki paidbah nongshong shnong ka jylla ha sor bad nongkyndong” la pynkut u Bah Prestone Tynsong.
