Ba khyrwit tyngeh u lapbah, shlei um ka ïingmane jong ka Balang Now Generation Nongstoiñ

Shillong, Jylliew 17 : Ka jingther u lapbah hynin ka miet ha ki bynta jong ka West Khasi Hills ka la poi haduh u pud ba ka umsaw na ka wah Nonbah ba kan rung syndon haduh Iingmane jong ka Balang Now Generation Outreach Revival Assembly, Nongstoiñ hynne ka step sngi Saitjaiñ.
Katkum ka jingïathuh da u Pastor Batkupar Dunai, la ong ba katei kadei ka shnat Balang jong ki ka don ha Lad Rambrai ha syndah bad katei ka wah.
U Pastor Dunai u la ïathuh ruh ba ha katei ka jingjia, ki tiar ba ju pyndonkam da ka Balang kynthup naduh ki kor pynsawa nangta ki ben ki shuki bad kiwei kiwei ki tiar ki la shah ktah bad julor ruh na ka jingrung katei ka um.
“Na ka liang u Pastor incharge, Rev. Jelningstar Wanniang u la pyntip ba ki la don ruh ki tiar kiba la jot bad la sniew ha katei ka jingjia. Hynrei ki sngewnguh bad ainguh ïa u Blei ba kam shym la don pat kano kano ka jingjia ba sngewsih ïa ki para bangeit kiba ju wan ban duwai ha iingmane,” u la ong.
Katkum ka jingïathuh jong u, donbok ba ha katei ka step ym shym la don kano kano ka prorkam ba ki ju buh kyrpang lane ki jingduwai dang step phyrngap lane ki jingduwai miet.
Lah ruh ban kdew hangne ba ka sor Nongstoin bad ki markhap ka la sakhi ïa ka jingshlei um kaba jur ha kane step sngi Saitjaiñ.
Ka jingther jong u lapbah ba jur ka la pynlong ruh ïa ka wah Nonbah bad ka wah Nondein ban kiew kynsan bad shlei wat sha ki shnong kiba don harud katei ka wah.
Ka la don ruh ka jingtwa khyndew, ka jingshlei um bad ka jingthut shipor ha ka leit ka wan ha ki katto katne ki jaka ha katei ka sngi.