Shillong, Jylliew, 17: Kawei ka heprit kaba dang 12 snem ka rta na ka jaidbynriew Naga kaba sah ha kawei ka shnong ha West Jaiñtia Hills District kaba dang pule ha ka Class-VII ka la shah thombor ha uwei u runar uba la 31 snem ka rta uba sah ha ka shnong Mairang, Eastern West Khasi Hills District haduh ba kan da mynsaw.
Kane ka heprit ka don mynta ha ka jingshah sumar ha NEIGRIHMS Hospital, Shillong.
Ha u kyrwoh ba ka Rongmei Phwam, Shillong ka la phah sha ki lad pathai khubor ha ka sngi Saitjaiñ ba la soi kyrteng da u Chairman u K. Namgadai bad u General Secretary u Dr. GAithoiliu Phaomei, la pyntip, ba kane ka jingjia, ka la jia ha ka 15 tarik mynta u bnai ha ka por 6 baje mynmiet ha kaba u runar u la leit rung hapoh ing katba kane ka heprit ka dang don marwei bad thombor ïa ka longrynieng jong ka da ka jingthmu ban leh be-ijot bad pyrshang ruh ban dkhat jubor wat ïa ka jingim jong ka.
U kyrwoh u la pyntip shuh shuh ba ha kane ka jingshah thombor, kane ka heprit ka la mynsaw na ki bynta jong ka khmat ka diang, na u ryndang bad na ka kpoh bad kiwei de ki bynta jong ka met.
Ka Rongmei Phwam, Shillong ka la dawa ïa ki bor jong ka aiñ ba kin kem mardor bad ban pynshitom ïa u nongleh kam bymman katkum ki kyndon jong ka aiñ.
Ki Pulit kiba la ïoh pdiang ïa ka ujor ki la register case bad tian bishar ruh ïa u nonglehkam bymman hadien ba la ïoh kem ïa u.
