Shillong, Jylliew, 17: Katto katne ki briew kiba ïaid lynti na khlaw Malki ha ka janmiet sngi Saitjaiñ ki la lap ïa kawei ka metïap jong i khunlung ba dang shu kha ïa kaba la thang ingkhong hapoh kane ka khlaw.
Uwei na ki nongïalam shnong jong ka shnong Malki u Bah Junestar Kharbuli ha ka jingïakren bad u nongthoh khubor u la ïathuh ba ïa kane ka met ïap jong i khunlung ba la thang ingkhong da ka ding ha ka khlaw Malki, la lap da ki briew kiba sah ha Lumparing kiba dei ïaid lynti na kane ka khlaw.
“Mar mar ki la pyntip sha ki samla jong ka shnong Malki bad hadien kata la pyntip noh sha ki nongïalam jong ka Dorbar Shnong Malki kiba la pyntip pat sha ki Pulit ba kin wan shimti ïa kane ka met,” ong u Bah Kharbuli.
U Bah Kharbuli u la pynpaw ruh ka jingsngewkhia ba ki briew kiba nabar ki ju pynlong ïa ka khlaw Malki kum ka jaka leh ïa ki kam bymman kiba ju jia na ka por sha ka por bad ha kajuh ka por u la kyntu ïa ka tnat Pulit ba kan shimkhia ban thwet mardor ïa kiba donkti ha kane ka kam bad ban pynshitom katkum ki kyndon jong ka aiñ.
Ki Pulit kiba la wan poi ha kane ka jaka, ki la shimti noh ïa kane ka metïap jong i khunlung bad rah sha Civil Hospital ban leh ïa ka Post Mortem.
Kat haduh ba la thoh ïa kane ka khubor, ki Pulit ki dang pynlong ïa ka jingtohkit kaba bniah ban lap ïa kiba donkti ban thang iingkhong ïa i khunlung ba dang shu dep kha katto katne kynta ha katei ka khlaw.
