Shillong, Iaiong 29: Ki Nonghikai Adhoc ki ba kynthup ia ki Nonghikai LP ,UP ,Secondary bad Hr.Secondary School ki ba hap ha Amlarem Subdivision bad kiba don hapoh ka Lama jong ka Federation of All School Teachers Of Meghalaya (FASTOM) ki la pynlong ia ka jingshong kyllain mungor (Sit -in- Demon-stration) hynnin ka sngi 28 tarik Iaiong ha Amlarem.
Kine ki Nonghikai kila shong kyllain mungor naduh ka por 10 baje mynstep haduh ka por 3 baje janmiet bad la wan ia shim bynta da kum ba 150 ngut ki Nonghikai.La pynbteng ia kane ka jingiakhih haduh mynta ka sngi 29 tarik Iaiong.
Kum ban shu pynkynmaw,la pynlong ia kane ka jingiakhih ban pynbor ia ka sorkar Jylla ba kan kyntiew lane pynheh noh ia ak tulop jong ki Nonghikai skul Adhoc naduh LP haduh ki Hr. Secondary school.
Ki nongialam ka FASTOM na kane ka thain, ki la kyrpad ia ka sorkar ba kan peit lem ia ki jingeh jongki bad ki la kyntu kyrpang ruh ia u Myntri ka Tnad Pule Puthi u ba dei u MLA ka thain ba un phai lem bad ban peit ia ki jingeh jongki Nonghikai ha ka jylla baroh kawei.
Ki nongialam ki la ong ruh ba kum ki Nonghikai kim banse ban mih sha surok ban dawa ia ka hok.
