Ki khynnah skul ki don kyrhai ka por, hynrei kaba kordor dei ka por ha ka pule puthi: Rakkam A. Sangma

Mawkyrwat, Jylliew, 15: Kum ka dak jong ka jingaimynsiem, jingpyn-shlur bad jingkyrkhu kyrdoh, ka Presbyterian Higher Secondary School, Mawlangwir ka la ïoh ban pynkup burom ïa ki khynnah skul kiba la wan shakhmat ha ka jingïaleh exam jong ka SSLC bad HSSLC jong mynta u snem haba u Myntri ka tnad pule puthi jong ka Jylla Meghalaya, u Rakkam A. Sangma u la long kum u kongsan.
Haba kren kum u kongsan, u R.A. Sangma u la pynpaw ka jingaikhublei bad kyrkhu kyrdoh na ka bynta ki khynnah pule jong ka Presbyterian Higher Secondary School, Mawlangwir kiba la poi sha ka thong jong ka jingjop ha kane ka jingïalehkai exam bad da ka jingjop jong ki ka la wanrah ka jingsarong ym tang ïa ki, hynrei ïa ki kmie ki kpa, kiba ha ïing ha sem bad khamtam eh ïa skul baroh kawei lyngba ki nonghikai kiba la ai ha ki ïa kiba bun ki jinghikai.
U la ong ruh ba kum ki khynnah skul ha ki don ha ki jingpule ki dei ban don ïa ka thong ba shakhmat kaei ba ki thmu ha ka jingim jong ki khnang ba kin lah ban long kita kiba don ka mynsiem jong ka jingïakhun ne jingïakop namar ki im ha kine ki sngi ba kiba bun ki don ïa kata ka mynsiem. “Kane ka jingjop jong ki ka dei tang ka jingsdang ba kum ki khynnah skul kin hap ban ïada ïa ka lynti kaba dang jngai bah, bad lada ki sdang ban kiew ha ki klas kiba kham hajrong kin sa ïa kynduh bun ki jingeh, kumta long borabor kiba trei shitom bad aiti lut da kaba kin pyndonkam hok ïa ka por jong ki”, ong u Myntri ka pule puthi.
Haba kren halor ka dorkhas ba la dep ban buh ki jingkyrpad ha ka Sorkar, u Myntri ka tnad pule puthi jong ka Jylla Meghalaya, u la ong ba un sa shimkhia da kaba bud-dien ïa ka khnang ban lah ban pynurlong ïa ki jingthmu baroh ba kum ka skul ka donkam. Namarkata, u don ka jingkyrmen ba nangne shakhmat kum u Myntri ka tnad pule puthi u don ka jingangnud ban wahrah shibun ki jingkylla bad kumno ban pynbha ïa ka pule puthi hapoh ka Jylla Meghalaya baroh kawei khnang ba ki khynnah bad ki samla pule kin ïoh ïa ki jingmyntoi ha ka lawei la shi sngi.
“Ki khynnah ki don kyrhai ka por ban ïalehkai ha kiba bun ki bynta, hynrei kynmaw ba kum ki khynnah skul kim dei ban pynlut kai ïa por ha kita ki bynta pynban ka por kaba kham bun jong ki dei ha ka pule puthi khnang ba ka lawei jong ki kan phyrnsai”, ong u R.A. Sangma.
Ha kane ka sngi la ïoh ruh ban pynkup burom ïa ki khynnah skul kiba la wan shakhmat ha ki jingïaleh eksam kata ha ka SSLC bad HSSLC 2023 ba la pynïaid da ka kong R. Kharraswai, Assistant Teacher jong ka PHSSM bad kaba la pynsngew ïa nongjop kiba la wan shakhmat kata ha ka exam SSLC u samla Kandarson Marweiñ uba la ïoh 81% bad jingkheiñ kham bun ha ka Science, Social Science, Khasi bad ïoh 100 mark ïa ka Health Education. Katba ha ka HSSLC pat ka Balapdianghun Lyngdoh Rngaid kaba la ïoh 71% bad ïoh jingkheiñ kham bun ha ka Political Science bad ha ka English.
Kiwei de ki nongkren ha kane ka sngi ki long u Ambrose Marak, Director of Higher Technical Education (DHTE), Shillong, u bah H.M. Shangpliang u Nongaibuid jong ka tnad pule puthi jong ka sorkar Meghalaya, u bah Renikton Lyngdoh Tongkhar, MLA ka Mawkyrwat Constituency bad ka jingkren lamphrang na u Dr. K.K. Nongsiej, Secretary jong ka Managing Committee jong ka Presbyterian Higher Secondary School, Mawlangwir.
Kham ha shwa la pynïaid ïa ka jingïalang da u babu W.L. Snaitang, Assistant Teacher, ka jing-dwai sdang na u T.Bn. D.D. Khardewsaw, President ka Managing Committee, ka jingrwai pdiang sngewbha na ki khynnah skul, ka jingkren khublei na u babu W.K. Syiemlieh, Headmaster jong ka PSSM, bad ka jingdwai pynwai na u Pastor H.W. Nongsiej.