Mawkyrwat, Ïaïong 29: Ka Khasi Students’ Union (KSU) jong ka Ranikor Unit ka la buh ka jingdawa na ka kompani jong ka Bharat Sanchar Nigam Limited (BSNL) ba ka dei ban pynbiang ne pyntreikam noh ïa u tower BSNL uba don ha Ranikor kaba hap ha ka C&RD Block Ranikor khnang ba ki paidbah jong ka dong ka thaiñ kin nym ïa kynduh jingeh ha ka liang ka kor mobile.
Ha ka kyrwoh khubor ba la phah da u President ka KSU jong ka Ranikor Unit, u Firstborn Turnia u la ong ba na ka liang ka seng ha ryngkat ka Unit baroh kawei ka da dawa jur ba na ka bynta une u tower u ba ki la wan pynieng khlem network mynta lah shi bnai tam ar bnai, hato ki thmu ne mut ban wan pynïeng statue ne wan ban pyntrei kam, namar haduh mynta ym pat treikam ei ei ruh em. Kumta lada kim lah ban wan ban pyntreikam, kum ka seng ka la buh ka jingmaham ba kan sa shim da kiwei pat ki bynta kiba tyngeh, ha kaba da ka jingbym don jong ka network bun bah ki jingduh nong ba ki paidbah ki la ïa kynduh khamtam eh ki khynnah pule.
