Shillong, Jylliew, 13: Ka Sorkar Pdeng ka la mang pisa T. 180 klur na ka bynta ban pyntreikam ïa ka Dam Rehabilitation and Improvement Project (DRIP) ha ka jylla Meghalaya.
Ka Pung Umïam ka dei kawei napdeng ki Pung ha ka ri kaba la shah kynthup na ka bynta ban pynkhuid hapoh ka DRIP da ka Sorkar Pdeng.
“Hapoh ka wat banyngkong, ngi la ïoh ïa ka mang pisa kumba T. 180 klur ha kaba ngi la khot tender kumba T.15 klur….” ong u Managing Director jong ka Meghalaya Energy Corporation Limited (MeECL) u Sanjay Goyal ha ka jingïakren bad ki lad pathai khubor ha ka sngi Baar.
U la ong ba ka DRIP kam peit tang na ka bynta ka jingshngaiñ jong ka Dam hynrei ka peit ruh ïa ka jingim jong ka dam, kiwei dei ki lad jingïada ïa ka Dam.
“Ka thong ka long hapoh kane ka projek, ngi hap ban ïada bad ban pynkhuid ruh ïa ki bynta jong ka Dam,” u la ong bad bynrap, “ïa kane ka projek yn pyntreikam haduh u snem 2025 bad nga thikna ba ngi la ïoh kham bun ïa ka por ban leh ïa kine ki kam.”
U Managing Director ula pyntip ba ar tylli ki song hapoh ka DRIP ladep ban mynjur katba kiwei pat ki song ki dei kiba la phah sha ka Ministry ba dei peit ban ïoh ïa ka jingmynjur bad “tang shu ïoh ïa ka jingmynjur ngin sa pyntyllun shakhmat ïa ka kam.”
Katkum ka jingïathuh jong u Goyal, na ka jingjurip kaba bniah da ki kynhun bapher bapher, ka jingkieng ba la shna ha Damsite ka long kaba shngaiñ haduh mynta.
“Ngi la leh bun tylli ki test kham mynshwa. Ngi la pynkhreh lypa ban shim ruh ïa ki lad jingïada lada donkam,” la ong u Goyal.
U Managing Director u la ïathuh ba ka tnat ka la shimkhia bha ïa ka jinglong jingman jong ka pung Umïam hapoh ka DRIP ba la mang da ka Sorkar ha kiba ka jingbishar bniah ka dang ïaid shakhmat.
Ka jingwad bniah ka long la ka don neem ka jingpei, ka jingorpait jong ka Dam. “Kine ki jingwad bniah ki dang ïai bteng hadien ba la bthah da ka Sorkar ha kaba ngi la aiti sha ka IITGuwahati ba kan aiti sha ngi ïa ka kaiphod ba pynthikna ba ka jinglong jingman jong ka dam bad ka jingkieng ki long kiba shngaiñ,” u la ong.
Shuh shuh u Goyal u la ong hapoh ka DRIP, ka IIT Guwahati ka la bishar bniah ïa ka jinglong jingman jong ka Leshka Power Project bad kiwei kiwei ki Dam.
