Shillong, Jylliew 13 : Kum shi bynta ban kyntiew ïa ki samla ha ka pule puthi khamtam kiba wan na ki longïing kiba duna ka ïoh ka kot ha Mawkynrew Constituency, na ka liang u Bah Banteidor Lyngdoh, MLA kane ka Constituency u la ong ba ka College kan dei kawei ka thong kaba u la buh ban pynurlong mynta ka kynti.
ïa kane u Bah Banteidor u la kren ha ka jingïalang plie ïa ka ïing skul ba thymmai jong ka Thynroit Presbyterian Secondary School ha ka 13 tarik u Jylliew, 2023 ha Thynroit. Ha kane ka jingïalang, ka Dorbar Shnong Thynroit ka la pynkup burom ruh ïa ki khynnah na kane ka skul kiba la pass ïa ka eksam SSLC mynta u snem.
U Bah Banteidor u la ong ba ki Secondary School ha ka thaiñ Mawkynrew ki la don bun bha bad ki la pynmih bun ngut ki samla pule kiba pass ïa ka eksam SSLC man u snem hynrei bunsien pat la lap ba ki ieh noh ban bteng jingpule namar kim ïoh lad shuh ban leit sha ki jaka pule ha nongbah Shillong na ka jingduna bad jingbym biang ha ka ïoh ka kot.
“Kum u MLA nga la kren sha ka Sorkar ban ai kawei ka College ba kan long ka jingmyntoi ïa ki khun samla ka thaiñ bad ba kin nym iehnoh shiteng por ïa ki jingpule”, la ong u Bah Banteidor uba la pyntip ba ka kam halor kane ka jingthmu ka la ïaid sha khmat.
Halor ka Thynroit Presbyterian Secondary School u la ong ba un bud dien da ka jingïatreilang bad ki bor pynïaid skul na ka bynta ka Science Grant kaba ki la angnud ban pynurlong. “Ym tang ïa kane ka skul hynrei na ka skhim SRWP kham bun nga la mang ban kyntiew ïa ki skul pule ha ka Constituency”, u la ong.
“Nga ïohi ha ki lad pathai khubor ba ka pule ka puthi ka hiar ha ka Jylla jong ngi bad kum kine ki khubor ki ktah bad pynsngew sih bad ngi hap ban thawlad ban pynneh ïa ka burom”, u la ong da kaba kyntu ïa ki khynnah skul ba kin long kiba minot ha ki jingpule lem ka jingkohnguh sneng bad don ka burom ka akor ïa la ki kmie ki kpa, ki nonghikai bad kiba la san.
ïa kane ka ïing skul la tei thymmai na ka mang tyngka jong ka skhim Special Rural Work Programme (SRWP) 2022-2023. Kiwei pat kiba la ïa donlang ha kane ka sngi ki kynthup ïa u Bah Harkin Warjri, Sordar ka shnong Thynroit, u Bah Pynkmenlang Kharrngi, Headmaster, ki nongïalam balang, ki riewrangbah, ki nonghikai bad ki khynnah skul nalor kiwei pat.
