Ka Sorkar kam lah ban aidaw ba dei ka jingther u slap halor ka jingjot rathai ka surok Jowai Bypass: HC

Shillong, Jylliew 13: Ka High Court of Meghalaya ha ka sngi Ba-ar ka la ong ba ka sorkar jylla kam lah ban shu aidaw halor ka jingther u slap halor ka jingjot ki surok ha ka jylla.
Haba shim bishar ïa ka PIL ba la ujor da u Kynjaimon Amse ha kaba idei bad ka jingjot rathai ka surok Nh-6 hapdeng ka Jowai bad Ratacherra, ka hukum jong ki arngut ki nongbishar ba kynthup ïa u Chief Justice u Justice Sanjib Banarjee bad u Justice W Diengdoh ka la ong ba ka jingjot rathai ka surok Jowai Bypass ha kaba ka kashari ka la shim ïa ka judicial notice ïa ki dur ki dar kiba mih ha ki kot khubor kaba pyni ïa ka jingjot kane ka surok.
“Na ka liang u nongujor ruh u la ai bad ki dur ban pyni ba kane ka surok ba dang shu dep maramot kam neh satia tang ar sngi ruh hadien ba la dep maramot,” ong ka hukum.
Ka kasahari ka la ong ruh ba ym lah ban len ba ka jingther u lapbah ka don bynta ban wanrah ïa ka jingneh ka surok, ‘hynrei kane ka jia shuwa ban sdang ka aiom lyiur. Ka sorkar kam lah ban aidaw ba ka jingther u lapbah kan wanrah ïa ka jingjot ka surok haduh bym long ïaid kali shuh namar ka jingjur u slap ha kine ki bynta jong ka ri ka dei kaba la tip lupa ba kan jia. Haba maramot dei ban kynmaw ruh ïa ka jinglong ka bneng ban pynthikna ba ka surok kan neh,” ong ka hukum.
Na ka liang ka kahsari ka la bthah ruh ïa u nongsaid aiñ ba un ïa kynuh bad ki ophisar ka PWD jong ka sorkar jylla ban pynthikna ba kane ka surok ka dei ban bha shuwa ban wan ka aiom lyiur bad u la bthah ruh ba ka NHAI kan pynthikna ba ka jingmaramot surok ka dei ban neh ym ban jot tang shu wan u slap.
Na ka liang ka NHAI ka la pyntip ruh ba ki don ki bynta jong ka surok na Jowai sha Khliehriat kiba donkam bnad maramot bad kumjuh ruh wat ha ki bynta ba kham sha khmat jong ka Sonapur tunnel ba ki don ki bynta ba donkam maramot.
Ka NHAI, ka la pyntip ba ka contract ha kaba ïadei bad kane la khmih lynti ban lah ban pynlait la kumno kumno ha ba kut u bnai Naitung mynta u snem.
Na ka liang u Kynjaimon u la pyntip ruh ba ka don ka jingtwa khyndew la katto katne bna ha ki bynta ka surok na Malidor sha Ratacherra ha kaba ym pat shym la shim khia eiei ha kaba ïadei bad kane, ‘lada ka dei kumta, ka NHAI ka dei ban shim khia kloi katba lah ïa kane,’ u la ong.
Ka kashari kan shim bishar biang ïa kane ha ka 21 tarik u Jylliew.