Ai jingthoh ka MeECL sha ka Regulatory commission ban bishar bniah biang ïa ka dor baiding ilektrik

Shillong, Jylliew 13 : Ka Meghalaya Energy Corporation Limited (MeECL) ka la buh ïa ka jingkyrpad da ka jingthoh hakhmat ka Meghalaya State Energy Regulatory Commission (MSERC) ba kan pynkylla thymmai biang ïa ka dor jong ka bording elektrik.
U Managing Director ka MeECL Sanjay Goyal haba ïakren bad ki nongthoh khubor mynta ka sngi Ba-ar ula ong ba ka dei ka jingshisha ba ki don katto katne ki mat haba ïadei bad ka jingpynshongdor ïa ka bording na ka bynta ki katto katne ki nongpyndonkam bording.
“Kat kum ka Corporation, ngim sngew ïahap halor ka dor jong ka bording kaba la buh mynta. Ki don katto katne ki kam kiba donkam ban hap bud. Namar kata, ngi la buh ka jingkyrpad hakhmat ka Regulatory Commission…Nga thikna ba ngin sa ïoh ïa katto katne ka jingmyntoi na ka Commission” ula ong.
Dang ha ka 6 tarik Jylliew u Myntri Rangbah u Conrad K Sangma haba kren bynniaw halor ka dor bording ba la buh da ka Regulatory Commission, u la ong ba ka ka sorkar kam don bor ha ka jingshisha ban buh ïa ka dor kaba la buh ban siew da ka MeECL namar ïa kane la rai beit da ka Commission.
Na kata ka daw ki riew paidbah ki hap ban siew kham heh ka dor ban ïa ki karkhana namar ki riew paidbah ki hap siew 6 tyngka katba ki karkhana pat tang 5 tyngka.
Kane ka dei ka dor ba la buh ne rai da ka Regulatory Commission wat hadien ba la dep kyrpad ba dei ban pynkiew ne pynheh ïa ki karkhana ruh. “Ngim shym la ïoh ka jingmynjur na ka Commission bad ngi dang ïai pyrshang haduh mynta ban phah jingthoh ban pynkylla biang ïa kane ka dor ban pynduna ka jingsiew na ki paidbah bad ban phah siew kham heh ïa ki karkhana” ong u Myntri Rangbah.