Shillong, Jylliew, 11: Ka jingther jong u lapbah lapsan ha kine ki khyndiat sngi, ka la pynkhie im biang ïa ka Pung Umïam kaba la sdang ring tyrkhong na ka jinghiar syndet jong ka um na ka jingrang tyrkhong jong ka bneng ha ki khyndiat bnai baladep.
Ka jingïaibteng jong u lapbah lapsan ban ther ha ka step sngi u Blei ka la pynkiew sa lai phut ïa ka jingdap jong ka um ha Pung Umïam. Ka jingdon jong ka um ka la kiew 3167.90 haduh ka janmiet sngi U Blei.
Ka Indian Meteorological Department (IMD) ka la maham ba ka jingther jong u lapbah uba jur kan dang ïai bteng ha kine ki san sngi ki ban sa wan ha ka jylla Meghalaya.
Ka IMD ka la maham ruh ba kan don jingthaba ka leilieh bad ka jingtied u pyrthat ha ki katto katne ki bynta jong ka jylla Meghalaya bad kumjuh ruh ha ka jylla Arunachal Pradesh, Assam, Nagaland, Manipur, Mizoram bad Tripura ha kaba u lapbah uba jur un hap ha kine ki jylla.
Ka IMD ka la ïoh jingkheiñ ba ka jinghap slap ha ka sngi Saitjaiñ ka long 1.8 mm ha kane ka jylla Meghalaya.
Lah ruh ban kdew hangne ba ka Meghalaya Energy Corporation Limited (MeECL) ka la hap ban pynlip bording 8-10 kynta ha ka shi sngi na ka daw ka jinghiar shaba jong ka jingdon jong ka um ha pung Umïam. Hynrei ka jingther jong u lapbah lahsan ha kine ki khyndiat sngi ka la pynim biang ïa ka Pung Umïam kaba ju bsa bording ïa ka jylla Meghalaya baroh kawei.
Baroh shikatta, kata, ha u bnai Ïaiong bad ha u bnai Jymmang, haba shu peit ïa ka jinghiar jong ka um ha Pung Umïam ka la pyndiaw mynsiem ïa ki paidbah nongshong shnong bad ïa ka tnat sam bording jong ka Sorkar Jylla kaba la maham ba ka lah ban poi haduh u pud ba ka jylla ka lah ban mad ïa ka jingshongdum lada duna shaba palat ka jinghap jong u slap ha kane ka aiom.
Hynrei tang hadien shitaiew ba la mih u bnai Jylliew, ka jingther jong u lapbah lapsan ka la wanrah jingkyrmen biang ïa ki paidbah nongshong shnong kiba ap khmihlynti la katto katne bnai ïa u slap u ban pyndap biang sa shisien ïa ka pung Umïam.
