Ban pahuh bording, pynkhreh ka Sorkar Jylla ban sdang noh sa ka Leshka Hydro Project – II

Shillong, Jylliew 10 : Ka Meghalaya Energy Corporation Limited (MeECL) ka la pynkhreh mynta ban pan ïa ka jingbit (environmental clearance) na ka bynta ban pyntreikam noh ïa ka Myntdu – Leshka Hydro Electric Project (MLHEP – II).
“Ngi la pyndep ïa ka jingpynshai paidbah (public hearing) bad mynta pat ngin leit sa sha ka kylla kaba ar ban ïoh ïa ka environment clearance. Hadien kine baroh ngin sa pynïaid pat ïa ka kam shakhmat,” ong u Myntri ka tnad Bording, u Abu Taher Mondal.
Lah ban kdew hangne ba ka Leskha – II, kadei ka projek bording kaba 210MW bad kaba la pynkhreh ban pyntreikam ha ka wah Myntdu.
Ïa kane la thmu ban pyntreikam tang ha ka shikylla bad ïa kane la thmu ban pyntreikam noh naduh u snem 2024 bad la pynkhreh ruh ba la kumno kumno yn ïoh ban pyntreikam noh pat naduh u snem 2027.
Ka Myntdu Leshka II kadei ka projek kaba thmu ban pyntreikam da ka Run-of-River lane ka jingtan bording ha ka wah kaba tuid. Ïa kane ka projek la mang ban pyntreikam ha ka jinglutkaba kot sha ka $423.187million.
U Myntri ka tnad Bording u la pyntip ruh ba ka don ka jingtyrwa ban pynbha ïa kawei pat ka projek bording kaba don ha Wah Umïam.
U ong ruh ba ki don katto katne ki paidbah jong ka thain kiba pynpaw ïa ka jingpyrshah halor katei ka jingtyrwa. “Hynin nga sngi nga la ïa kren bad ki MLA na katei ka thaiñ bad ngi la rai ban kynduh biang sa shisien pat ban pynbeit halor katei ka ishu,” ong u Myntri.
Halor ka jingkylli, u Myntri u la ïathuh ruh ba ïa katei ka projek yn pyntrei da ka North Eastern Electric Power Corporation Limited (NEEPCO). “Kumta, ngi don ka jingkyrmen ba kane ka projek kan treikam noh kham kloi.”