Shillong, Jylliew, 10: Arngut ki khynnah kynthei kiba la suba ba ki don jingïadei da kaba ïalang samla paramaki, ki la phet na la ïing kat haduh ba ki bahaïing hasem kiba la kulmar thlim ki la ujor da ka ejahar sha ki Pulit.
Ki bahaïing hasem kiba dap da ka jingkhuslai halor kane ka jingjahrngai jong ki khun kynthei na la ïing ki la ujor da ka ejahar sha ki Pulit khnang ban lap dien biang ïa ki.
Katkum u kyrwoh ba la phah da u Superintendent of Police (SP) City u Bah Vivek Syiem ha ka sngi Saitjaiñ u la ïathuh ba ar tylli ki ejahar ki Pulit ki la ïoh pdiang, kawei, ha Pasteur Beat House ha ka 26 tarik, Jymmang,2023 ba kawei ka khynnah kaba dang 13 snem ka rta na Golfinks Khliehshnong bad kawei ka samla kynthei kaba la 15 snem ka rta na Pynthorbah ki la jah rngai.
Hadien ba la ïoh pdiang ïa kine ki ar tylli ki ejahar mar mar la register case ha Shillong Sadar Police Station hapoh ka Section 363 IPS.
Ki Pulit kiba la pynlong ïa ka jingtohkit ki la suba ba kine ki arngut ki khynnah kynthei ki la phet lang ryngkat namarba ki dei kiba ïa ithuh ithaw bha.
Wat hapdeng ka jingthwet kaba jur ban lap biang ïa kine ki khynnah kynthei hynrei ki Pulit kim shym la lap dien satia bad hadien kane, ki Pulit ki la pyntip sha baroh ki Police Station ha ka ri baroh kawei shaphang kane ka jingjah rngai jong kine ki arngut ki khynnah rit.
Hynrei ka Missing Desk jong ka East Khasi Hills hapoh ka jingïalam jong u Havildar Sanjit Pandey bad u Investigating Officer jong kane ka Case u Sub Inspector Topon Marak ki la pynlong ïa ka jingtohkit kaba bniah bad lyngba ka jingtrei shitom ki la lap ba kine ki arngut ki khynnah kynthei ki la sah ha ka ing jong ki bahaing hasem ha ka shnong Tumpreng, West Karbi Anglong.
U SP u la ïathuh ba ki Pulit kin sa pynlong ïa ka jingtohkit kaba bniah halor ki daw kiba pynlong ïa kine ki arngut ki khynnah kynthei ban phet na la ïing.
