Khliehriat, Jylliew 10 : Ki pulit jong ka Lumshnong Police Station mynta ka sngi ki la ioh ban kurup u drok heroin uba khia 63.12 gram, kumta halor kane ki pulit ki la kem noh ia uba donkti uba la tip kyrteng kum u Sorif Uddin Sorifuddin, 50 snem kyrta, uba na ka shnong Bhairabpur, Part-V, kaba hap hapoh ka PS. PO Kalain,District-Cachar, Assam.
La ong ba hadien ba ki pulit ki la ioh ia ka jingtip ba tikna ba don u briew uba khaii drok uba wan na ki thaiñ Kalain ba thmu ban leit sha ki thaiñ Khliehriat uba kit bad ki song ba thep ia ki drok ban khaii beaiñ, kumta ka kynhun jong ki pulit ba tip kum ka ANTF lem bad ki pulit Lumshnong ki la pynap ktem hajan Lumshnong Police Station.
Kumta la ioh ban bat ia utei u nongkhaii drok bad la ioh ban kurup na u ia u drok herion ba la thep ha ki hynriew tylli ki synduk sabon, ki pulit ki la register ia ka ejahar ha Lumshnong Police Station bad la pynngat hapoh ki kyndon ain jong ka NDPS Act bad ka jingtohkit ka dang iaid shakhmat ban dup lap shuh shuh ia kiba donkti ha kane ka kam khaii drok.
