Shillong, Jylliew, 10: Ka North-Eastern Hill University Teachers’ Association (NEHUTA) kaba dei ka seng jong ki nonghikai ka skul NEHU dang shen ka la pynthymmai ïa ki nongkitkam ha kaba u Prof. Lakhon Kma u la shah jied kum u President, u Prof. D.V. Kumar kum u Vice-President bad u Dr. Marbhador M. Khymdeit kum u General Secretary.
Kiwei pat ki nongkitkam ki kynthup ïa u Dr. Juwesh Binong kum u Joint Secretary bad ka Dr. (Ms.) Jacqueline J. Thabah kum ka Treasurer. Nalor kine ki nongkitkam, la jied ruh sa hynriew ngut ki dkhot jong ka Executive Committee ba kynthup ïa u Prof. Donkupar Syiem, u Prof. Xavier P. Mao, u Dr. Pankaj Sarkar, u Prof. P. Hangsing, u Prof. Prasenjit Biswas bad ka Dr. Dokatchi Ch. Marak. La jied ïa ka Dr. Dokatchi Ch. Marak kaba na ka Garo Department ba kan mihkhmat na ka bynta ki nonghikai ka NEHU na Tura Campus.
Hadien ba la shimti kam, u Prof. Lakhon kma u la kren halor ka jingdonkam ban pynbeit ïa ki kynrum kynram ha kaba ïadei bad ki nonghikai.
U Prof. Donkupar Syiem kum u Professor uba la rangbah ha ka kam hikai u la ban jur ba ka NEHUTA kan ïaibteng ban pyndep ïa ki kam babha ba ka la leh bad kan trei shitom ruh ban kyntiew ïa ka jinglong jingman ha ka liang ka pule puthi.
Ka Executive Committee ba thymmai ka la rai ba ha ka jingïalang ba nyngkong kan shong pyrkhat halor ki mat treikam ba kan pyndep hapoh u snem 2023-24. Ha kane ka jingaiti bad shimti kam la ïadon ryngkat lang ruh bad kiwei pat ki Professor ba hakhmat jong ka skulbah NEHU.
