Nongpoh, Jylliew 06: Ban plie lad plie lynti ïa ki samla pule ka Ri Bhoi kiba don ïa ki sap ki phong bapher bapher ha ka jingim, ka Nehru Yuva Kendra Sangathan (NYKS), Ri Bhoi District, ka la pynlong da ka program kaba la mang na ka Ministry of Youth and Sport Affairs kaba la tip kum ka Yuva Utsav ïa kaba la pynlong ha St. Paul Higher Secondary school ha Nongpoh ha ka sngi Saitjaiñ ba la dep..
Ïa kane ka prokram jong ki samla pule ka Ri Bhoi la wan ban shim bynta da u Bah Vincent H Pala, MP ka Lok Sabha kum u kongsan bad la don ryngkat lang ruh u Bah Mayral Born Syiem, MLA ka Nongpoh kum u symbut kongsan bad la sakhi lang ruh da ka jingdon lang u Bah D. Rapsang, Deputy Director ka NYKS nalor kiwei kiwei ki ophisar bad ki dkhot jong ka NYKS.
Ha kane ka sngi, na ka liang ka NYKS ka la pynlong ïa ki jingïakop kiba kynthup ïa ka jingïakop dro dur, ka jingaikop thoh poetry, mobile photography bad kiwei kiwei ki jingïakop ha kaba ki nongjop ha kine ki jingïakop kin ioh lad ban leit shimbynta sha ka state level jong ka NYKS kaban sa long shen ha nongbah Shillong.
Haba ai jingkren ha kane ka sngi, u Bah Vincent H. Pala, MP ka Shillong, u la pynpaw ïa ka mynsiem jong ka jingsngewkmen ban pynlong kum kine ki prokram, kiba ailad ai lynti ïa ki khun samla ban sei ïa la ki sap ki phong ba ki don ha ka jingim jongki.
U la ong ruh ha kane ka juk stad ba mynta ka la dei ka juk kaba kham jwat bha na ka bynta ki khun samla ba kin poi sha kata ka thong kaba ki angnud, hynrei kum ki khun samla kim dei ban duh mynsiem bad ki dei ban don kata ka jingrai rangbah ba ïa kano kano ka kam kaba ki thmu ka dei ban long kaba jop na ka bynta ka lawei ba phyrnai jongki.
Shuh shuh, u la ai mynsiem ruh ïa ki khun samla ba kim dei ban don kata ka mynsiem jong ka jingsngewpoh ïa lade bad ki dei ban don kata ka mynsiem ba shynrang ha kano kano ka jingthmu jongki, namar dei tang kito kiba trei shitom bad kiba pyndonkam hok ïa la ka sap ba la ai da u Blei kin poi sha ka thong jong ka jingim, u la bynrap.
