Shillong, ïaïong, 28: Ha ka sien banyngkong eh, ka Department of Khasi jong ka skulbah North Eastern Hills University (NEHU) da ka jingïatreilang bad ka Department of Hindi ka la pynlong ïa ka jingïathir nia halor ka phang, “ka jinghikai bad pule ïa ka ktien Khasi sha ki bym kren Khasi,” ïa kaba la pynlong ha Non-Science Cluster jong ka University.
Ka thong haba pynlong ïa kane ka jingïathir nia halor kane ka mat ka long ban pynshlur na ka bynta ban pyndonkam ïa ka ktien Khasi hapdeng ki nonghikai bad ki samla pule jong kane ka skulbah.
Nalor ki samla pule bad ki nonghikai jong ka University, la ïashim bynta ruh ha kane sngi da ki khynnah skul bad ki nonghikai jong ka Kendriya Vidyalaya School, NEHU.
Haba kren ha ka jingplie ïa kane ka jingïathir nia, u Vice Chancellor jong ka NEHU u Prof PS Shukla u la ong ba ka National Education Policy ka kdew ïa ka jingdonkam ban nang ïa ki lai tylli ki ktien hapoh ka ri, ka ktien ba kren salonsar hapoh ka ri India, ka ktien ba la kren hapoh ka dong ka thaiñ bad ka ktien jong kiwei pat ki jaidbynriew nabar ri.
Ha kane ka jingïathir nia, dalade hi u Vice Chancellor u la pyrshang ban kren da ka ktien Khasi.
U la ong ba ki paidbah kin sa lah ban kham pynpaw kham bha dalade da kaba pule janai ïa kine lai tylli ki ktien bad bynrap ba kane ka juk ka la wan mynta hakhmat.
U Shukla u la ong ba wat ma u ruh u ju pyrshang ban pule bad ban ïakren bad ki Khasi da ka ktien Khasi katba lah ei.
Katkum ka jingong jong u, ki samla ki dei ban ïasam ïa ki jingsngew jong ki ha ka ktien kaba ki kren na uwei u khynnah pule sha uwei pat.
Haba ïathuh halor ka thong ba la pynlong ïa kane ka jinghikai ïa ka ktien Khasi, u nonghikai jong ka Deparment of Khasi, NEHU u Dr.Marbhador Khymdeit u la ong ba kane ka thong kan ïarap ïa kiwei pat ki bym dei ki Khasi bad ïa ki samla pule ba kin dup nang kumno ban ïakren ïa ka ktien Khasi khamtam ha kane ka skulbah ki samla pule ki dei kiba wan na ki thaiñ bad ki jylla kiba kren ïa ki jait ktien bapher bapher.
U la ong ba u Vice Chancellor u la banjur ïa ki nonghikai, ïa ki samla pule bad ïa kiba pule ïa ka jingwadbniah ban tip bad ban nang ïa ka ktien Khasi.
