Shillong, Jylliew 04 : Ka Voice of the People Party ka pynrem jur ïa ka rai jong ka sorkar jylla ban pyniaid da ki Odd/Even number ïa ki kali kamai kiba ju kamai ha ki thain Khyndailad bad Iewduh halor ka nongrim ban pynduna ïa ka dheng kali.
Ha ka kyrwoh ba la pyllailt da u Nongai Ktien ka VPP, Dr. Batskhem Myrboh la ong ba katei ka jingle jong ka sorkar ka long ka jingniew bein bad ka jinglehbein ïa kiba duk ha ka imlang sahlang kiba hap ban shaniah ha ki kali kamai kum ka lad ban kamai jakpoh bad ban poi sha ki jingleit jong ki.
“Ka long ka bym lah ban pdiang ïa kum ka jingle kane ka sorkar ban kynnoh ïa ki baduk ba kidei ka daw jong ka jingeh jong ka jingdheng kali ha ka nongbah Shillong. Ha ka jingshisha ka sorkar ka la dei ban tehlakam ïa ka jingpyndonkam palat ïa ki kali shimet ha ka nongbah Shillong bad ban pynshlur ïa ki kali kamai. Hynrei kane ka sorkar ka shim pynban ïa ki rai khongpong ba ktah ïa ka kamai kajih,” ong ka kyrwoh.
Shuh shuh la ong ruh ba baroh ki tip ba ka jingwan jong ki kali na kiwei pat ki jylla kadei ka dawbah kaba wanrah ïa ka jingkhapngiah ha ki thain Khyndailad bad Iewduh kiba wallam tang khyndiat ka jingïohnohnong ïa ka pla tyngka jong ka sorkar.
La kynnoh ruh ba kane ka sorkar ka long khawpud ban shim ïa ka rai ban wanrah ïa ka jingbha ïa ka imlang sahlang hynrei lada ktah ïa ki heh ki hain kam salia ban shu shim ïa ki rai khlem kynjoh ktien na kito kiba shah ktah pat na ka rai jong ka sorkar lada ki dei kiba rit ba riat.
“Ki khun samla ha ka jylla kin dang trei aiu shuh? Kadei ka kamram jong ka sorkar ban pyntikna ba kan don ka jaka ieng kali kaba tikna ïa ki kali kamai ban pynhiar bad pynkiew ïa ki nongleit nongwan na ka bynta ka jingbiang lang kiba bun. Kumta ka party ka dawa ïa ka sorkar ba ka dei ban weng noh mardor ïa kane ka ain ïakjakor kaba ktah ïa ki paidbah,” bynrap shuh shuh ka kyrwoh.
