Lada bakla ka jingpynbeit pud ha ka Phase-II kan mih ka jingjaw snam: HBRF

Shillong, ïaïong, 28: Ka Hynñiewtrep Border Disputed Redressal Forum (HBRF) ha ka sngi Palei ka la ong ba ki Seng riewlum kiba ïatreilang hapoh ka Sorkar Meghalaya Democratic Alliance (MDA) kim ban shu thehkti halor ka jingïasoi ïa ka Memorandum of Understanding hapdeng u Myntri Rangbah ka Jylla Meghalaya u Conrad Kongkal Sangma bad u Myntri Rangbah ka Jylla Assam u Himanta Biswa Sarma ban pynkut noh ïa ka jingïakajia pud kaba la neh jin san phew snem kynthih ha ki hynriew tylli ki jaka kiba don ha khappud ha Meghalaya bad Assam.
Ha ka sngi Balang u Myntri Rangbah u Conrad Sangma u la ong ba ha ka sngi ba la ïasoi ïa ka MoU hakhmat u Myntri ka tnat Kam Pohing ka ri u Amit Shah ha Delhi, la sakhi lang da ki Myntri Sorkar, arngut na ka United Democratic Party (UDP), uwei u Myntri na ka People’s Democratic Front (PDF) bad uwei u Myntri na ka Hill State People’s Democratic Party (HSPDP).
“Hynrei kaei kaba ngi ïohi ka long ba ki sengriewlum kiba don ha Khasi Hills Autonomous District Council (KHADC) ki byrngem ban leit mudui sha ka Ingkashari bad kine kijuh ka sengriewlum kiba don ha ka Sorkar ki dei kiba kyrshan ïa ka jingïasoi ïa ka MoU,” la kynthoh u Nongaiktien jong ka Forum u Bah Thomas Passah ha ka jingïakren bad ki lad pathai khubor ha ryngkat ka jingïadonlang jong u Chairman u Bah Chandame Sungoh bad ka Secretary ka Kong Purity Phawa.
“Lada u Myntri Rangbah u shu thok halor ka jingkam jong u, ki dei ma ki (seng riewlum) ban pynshisha bad lada kim lah ban leh kumta ka pynpaw ba ka jingkren jong u Myntri Rangbah ka long kaba dei,” u la ong.
“Ka jingkylli kaba mih mynta ka long, hato ki sengriewlum kiba don ha District Council bad hapoh ka Sorkar ki dei kijuh ne la ki jong? la kynthoh u Bah Passah.
“Ngi sngewnguh ïa ka KHADC kaba dei ka nongri nongsumar ïa ka khyndew ka shyiap kaba la shim ïa kane ka sienjam khnang ba ki paradoh parasnam jong ngi kin ym duhei ïa la ka jong ka khyndew ka shyiap,” ong shuh shuh u Bah Passah.
U la ong ruh ba katkum ka jingïoh jingtip na ki lad pathai khubor bad na ki jingtip ba la ïohlum, la ong ba ki jaka kiba bun ki dei kiba la ïoh da ka Meghalaya hynrei kam long satia kumta.
“Lada ka jaka ka dei kaba biang lut ïa ki kot ki sla ha Meghalaya balei pat la shu pynhap sha Assam. Kane ka jingïasoi ïa ka MoU ka long kaba sngewsih. Ka jingbym kynthu lang ha ki Regional Committee ïa ki Sordar Shnong, ki Rangbah Shnong, ki riewpawkhmat kiba tip bha ïa ki jaka ki puta, ki trai khyndew, ka KHADC bad ka JHADC ka long kaei kaei kaba sngewsih,” u la ong.
“Lada ha Assam ïa ka mat ïapynbeit pud la rah hapoh ka Ingdorbar Thawaiñ hynrei balei pat ha Meghalaya shwa ban soi ïa ka MoU bad hadien ba ladep sorjamin ki Regional Committee bad la poi ka sien shong dorbar hynrei ym shym la rah satia hapoh ka Ingdorbar Thawaiñ bad u Myntri Rangbah u kyntait ban ïakren halor kane ka mat. Ka jingmih ki kynrum kynram haduh katne ka long ka bym lah satia ban pdiang daleilei ruh em,” ula ong.
Haba kynnoh ba ka Sorkar MDA ka la leh bakla shaba palat ha ka jingïapynbeit ïa ki hynriew tylli ki jaka ba ïakajia pud bad ka Assam u Bah Thomas ula ong, “ka Sorkar kaba mynta kam lah shu teipop ïa ka Sorkar kaba rim. Haduh mynta ngi kren pyrshah ïa ka Sorkar ym ïa ki Seng Saiñpyrthei. Kam long kaba suk ban shu teipop ïa ka Sorkar kaba rim bad ban pynksan pat ïa la ka jong ka jingbakla.”
“Kum ka kynhun ba ka la tur lut sha baroh ki shnong kiba don ha khappud ngi la ïohi ïa ka jingduhnong jong ki paradoh parasnam ha kane ka jingïapynbeit pud bad ngi la ïohi ruh ïa ka jingïam briew bad ka jingshah ktah kaba jur. Shisien ba la duh ïa ka khyndew ka long kaei kaei kaba eh ba ngin ïoh biang. Ki don shibun ki jingbakla bad ki kynrum kynram bad khamtam eh ka jingbym shai. Ki Seng Saiñpyrthei kiba don bynta hapoh ka Sorkar MDAkim lah shuh ban sait kti. Kam lah ban long ba ha ka Kynhun Myntri phin ïa khublei kti katba ynda phi kren pat sha ki padibah lyngba ki lad pathai khubor phi ïakren pyrshah iwei iwei. U paidbah u la kham shai bad u la kham stad, un sa bishar ïa kane ka bynta.”
“Ngi dawa ruh ïa ka Sorkar Jylla ba ka dei ban siew bailutksan ïa ki trai khyndew kiba la duh lut ïa ki jaka ki puta bad ki pung ri dohkha namarba ki la shah pynngat lut sha Assam,” la ong une u nongïalam ka Forum.
Shuh shuh u la ong, “mynta ha ka kylla kaba ar (Phase-II), ka jingïapynbeit pud kan long na ka bynta ki jaka kiba kham kongsan bad kiba jwat kum ka Block-I, ka Block-II, ka Langpih bad kiwei kiwei kiba eh bha. Lada ka Sorkar ka ïaid da kajuh ka lynti kumba la leh ha ka jingïapynbeit pud kaba nyngkong, kin ym jaw shuh ki ummat hynrei kan sa jaw ka snam ha kiba bun ki bynta jong ri Khasi jong ngi. Kata ngin kren da kaba shai.”
“Ha ka Phase-II, ka Sorkar ka dei ban kynthup lang ha ki Regional Committee naduh u trai khyndew uba la biang ki dulir, ki sengbhalang, ki Sordar, ka JHADC, KHADC, u MLA bad u MDC,” u la ong.
“Ngi kyrpad ïa ki Seng Saiñpyrthei ba ki dei ban ïakren biang halor ka MoU bad kam lah ban long kumba ong u Himanta Biswa Sarma ba ïa kaei kaba ladep thoh ym lah shuh ban pyndam. Kata kam lah ban long.
Da kaba kynnoh ba ka jingïapynbeit pud ha ka kylla banyngkong kam dei satia ka Give and Take Policy hynrei ka dei kaba shu ai tylli beit sha ka Assam une u nongïalam ka HRDF u la ong, “ka Assam ka la shu ïoh ei haduh 18.51 square kilomitar na ka 36.79 sq. km ha kane ka jingïapynbeit pud na ka bynta ki hynriew tylli ki jaka ba ïakajia pud. Ha ka jingshisha hi ka jingïapynbeit pud kam don jingmut namarba dei ka Jylla Assam kaba kyntur pud sha u pud u sam jong ka jylla Meghalaya.”
“Ka Forum hi kam lah satia ban pdiang ïa ka jingïasoi ïa ka Memorandum of Understanding hapdeng ka Meghalaya bad ka Assam naba kane ka jingïasoi ïa kane ka dulir ban ïapynbeit ïa u pud u sam ka la pynjaw ummat ïa kiba bun ki paidbah nongshong shnong ka jylla Meghalaya ki ban shah shah khynniat noh sha ka jylla Assam.
Ka Forum ka la pynpaw ruh ba ka kyrshan ïa ka jingpynbna ka KHADC ban mudui sha Ingkashari ïa ka jingïapynbeit pud.