Lyngba ka India-EU Global Gateway Conference yn nang khlaiñ ka jingïadei ka India bad ka EU : Conrad

Shillong, Jylliew 2: U Myntri Rangbah ka jylla Conrad Sangma ha ka sngi Palei ula plie ïa ka dorbar jong ka European Union (EU)-India Global Gateway conference ha ryngkat u Myntri Khynnah ka kam korbar bar ri Rajkumar Ranjan Singh, ha ka jingïadonlang u Koen Doens, DG, Directorate General for International Partnerships, European Commission, Ugo Astuto, Ambassador ka EU sha India bad Bhutan bad u Santosh Jha, Ambassador ka India sha EU.
ïa kane ka dorbar la plie ban pynkhlaiñ ïa ka jingïakren bad ban ithuh ïa ki jingdonkam ha ka liang ki lad pynïasoh ha kane ka thaiñ.
Ka jingthmu jong kane ka dorbar ka long eh ban kyntiew ïa ka jingkynshew ha ki lad pynïasoh ki bym pynjaboh ïa ka mariang, kiba ïaid kat kum ka jingstad saian ha ki Jylla ka thaiñ Shatei Lam Mihngi ka Ri India.
Haba pyntip ia kane lyngba ka Twitter, u Myntri Rangbah ka Jylla Conrad K Sangma ula ong “Sngewtynnad eh ban ïashimbynta ha ka EU-India Global Gateway Conference ha Shillong.”
“Ka thain Shatei Lam Mihngi ka Ri India ka dei kaba la kyrkhu ban don ha kane ka bynta jong ka pyrthei, kaba don marjan bad bun ki Ri ka South East Asia bad namar kata, ka lah ban long ka khyrdop ban wanrah ïa ka jingïadei ba ïajan na ka bynta ka jingmyntoi ka India bad ka EU”.
“Ka spah riti dustur, ka spah mariang, ka jingdon ïa u pud u sam uba jrong bad kiwei ki Ri ka dei ka lad ka kabu ba ka EU bad ka India ki lah ban shim bad pyndonkam lyngba ka jingïatreilang” ula ong.
U Myntri Rangbah ha ka twitter ula ong ruh ba u kyrmen skhem ba kane ka jingïasyllok kan sei ïa u soh u ban pynkhlaiñ ïa ka jingïadei hapdeng ka India bad ka EU.
Ki Heh Ophisar jong ki Jylla ka Thain Shatei Lam Mihngi, Bhutan, Nepal bad Bangladesh lem bad ki kynhun na ki kompani shimet kila wan ïashimbynta ha kane ka dorbar kaba sdang hynnin ka sngi bad kut mynta ka sngi.