Jowai, Ïaïong 28: Shi bynta ban pynkiew ïaka kam rem kam riang jong ki nongrep hapoh ka jylla, mynta ka sngi u MLA ka thaiñ u ma Lahkmen Rymbui ula sam ïa ka pisa da ka Cheque kaba T.64 lak tyngka sha ki 57 tylli ki kynhun treimon sngewbha jong ka Amlarem Block lyngba ka skim FOCUS Programme bad ka MegLAM.
Ha kane ka juh ka sngi u Myntri ula ïoh ban plie paidbah ïa ka Collective Marketing Center (CMC) ha shnong Shkenpyrsit kaba la kot T.7 lak tyngka ba la shna kyrpang da ka Integrated Village Cooperative Society (IVCS).
Hashwa kane la don ka jingïalang ba lyngkot bad la ïoh ïa ki kyntien pdiang da u Dr. D. Lyngdoh BDO ka Amlarem, ula pynsngew ruh ba ka shnong Shkenpyrsit ka la kiew bha ha ka kam rem kam riang lyngba ka jingtrei shitom jong ki nongrep ka shnong.
U kongsan ma Lahkmen Rymbui ula pynsngew ba ka sorkar kala pyrshang ban wad ki lad ki lynti halor kynno ban pynkiew ïa ka kam rep kam riang da kaba plie ïa ki lad jingïarap lyngba ki skim bapher bapher khnang ba ki nongrep ka jylla ki lah ban ïoh lyngba ka tnad jong ka rep ka riang.
Shuh shuh u myntri ula pynsngew sha ki nongrep shaphang ki lad bad jingmyntoi kiba lah ban ïoh naka sorkar kiba long kum ki kabu kiba lah ban wan haka dur jong ka skim kiba la tip kum ka Piggery Mission, ka Jackfruit Mission, ka FOCUS Programme bad kiwei.
Ula ai ruh ka jingïaroh ïa ka nongrep ka thaiñ Amlarem Block kila long shisha ki nongrep kiba treishitom met bad mynsiem wat lada ki don ha ka jingduna ka jingstad ha ka pule ka puthi hynrei ïa ki mar rep lah ban ïoh da ki laiphew jait.
Kiwei de kiba ai jingkren ha kane ka sngi ki long u ma C. Najiar uba long u Sub Divisional Agriculture Officer, ka kong D. Syngai ADC ka West Jaiñtia Hills, u ma W. Kyndait na ka Integrated Village Cooperative Society (IVCS).
