Nongpoh, Jymmang 31: Hadien ka jingplie paidbah ïaka District Council Courts ha Nongpoh, U Bah Titosstarwell Chyne CEM ka KHADC u la pynpaw ba kumba long mynta ka kam ba kongsan jong ka tnad KHADC kaba don ha Nongpoh kalong ban lum ïaka Professional Tax naki briew kiba dei ban siew ïa kane ka khajna, hynrei naka liang ka Council ka don ruh ïaka jingthmu bad ka jingpyrkhat ban nangpyniar bad pynpoi ruh ïakiwei ki tnad treikam khnang ba kan long ka jingsuk ïaki paidbah.
U la ong ruh ba naka liang ka EC kaba mynta kala dep ban pass ïaka Land Bill bad lyngba kane la land bill kala ailad ïaki paidbah ba kin pynskhem (Register) ïaki jaka puta jong ki, lyngba ka Land Rights Certificate bala ai da ka District Council bad hadien ba la ioh ïa kane ka Land Rights Certificate ki paidbah kin sa lah ban leit sha ki bank ne kino kino ki jingdonkam jong ki namar ka dei kaba la ithuh.
Shuh shuh u la ong ruh ba naka liang ka EC kala sngew donkam ruh ba kane ka tnad jong ka District council kan don noh ha Nongpoh kumba bun naki paidbah ki donkam ban pynskhem ïaki jaka puta jong ki khamtam sha ki thaiñ khappud ban nang pynsuk ïaki ba kim donkam shuh ban leit shaduh Nongbah Shillong, u la bynrap.
