Ka jingbym khot ïakren ka sorkar dei namar ka ktah ïa ka Party ba ïalam ïa ka Sorkar : HYC

By Mawphor Editor On May 30, 2023

Shillong, Jymmang 29: Mynta ka sngi kaba dei ka sngi kaba hynriew jong ka jingshah thngan u Bah Ardent Miller Basaïawmoit, ki Sengbhalang bapher bapher, kynthup ïa ka HYC, FKJGP, HNYF, JSU ki la wan jngoh bad ai jingkyrshan ïa ka jingïakhih halor ka jingdawa ban pynthymmai ïa ka Reservation Policy.
U Bah Robertjune Kharjahrin, President ka HYC, haba ïakren bad ki nongthoh khubor, u la ong ba ka Reservation Policy kaba la treikam la palat sanphew snem ka la dei ban sdang noh ïa ka lynnong kaba thymmai namar ba kadei ka Policy kaba la lah shiliang tang sha kawei ka jaidbynriew. U la ong ruh ba ha ka jingpyntreikam lei lei sa ïa ka Roster System naduh ka snem 1972, ka jaidbynriew Khasi Jaiñtia ka la nang shah khñiot shuh shuh, namar ba kan don ka jingpynrung kam kyrpang ïa jaidbynriew Garo kaba kim shym la ïoh ne kaba ki la ïoh duna naduh ka snem 1972. U la ong ruh ba ka jingpynbeit ban pyntreikam ïa ka Roster System khlem da ka pynbeit thymmai ïa ka Reservation Policy kam don jingmut satia. “Sngewlyngngoh ban ïohi ba ka sorkar ha ka jaka ba kan pynbeit thymmai ïa ka Policy ka kham shimkhia pynban ïa ka Roster System”, u la ong.
U nongïalam ka HYC, u la ong ruh ba kano kano ka Policy la ka long ka Industrial Policy ne kano kano ka Policy hi ka don beit ka jingpynbeit thymmai ne ka jing
U la ong ba kane kadei ka buit jong ka sorkar ba la ïalam da ka NPP, namar ba kane ka Party ka la jop bun ki MLA ha kane ka elekshon baladep, kadei halor kane ka ishu jong ka Polisi bhah kam. “Kadei kane kaba la pynlong ïa ka sorkar ban shem jingeh ban khot ïakren halor ka Reservation Policy namar kan ktah ïa ki kum ka Party kaba ïalam ïa ka sorkar”, la ong u Bah Robert.
Halor ka jingkren jong u Myntri ka sorkar jylla, u Rakkam Sangma, uba long u Myntri ka pule puthu ba kane ka ishu jong ka Reservation kan long kum ka ding, u nongïalam ka HYC, u la ong ba haba u Myntri u ai ding khlem pep hi ka ding kan mih bad haba ka thang ma u ruh un ing.
U la ong ba ki jingïakynad kin mih haba don ki Myntri ha ka sorkar ki bym sngewthuh haba ki kren bad ki kren ruh ym ki Myntri jong ka sorkar jylla, hynrei ki kren kum ki Myntri jong ka jaidbynriew.
Hynrei na ka liang ka HYC, u la ong ba ka long kaba la khreh na ka bynta kane bad lada ka seng ACHIK ka lah ban dawa ban pynlong ïa ka Tura kum ka Winter Capital, ka HYC ruh ka long kaba la kloi ban dawa noh la ka jong ka jylla na ka bynta u Khasi Jaiñtia. “Balei ka ACHIK ka dawa la ka jong ka nongbah ha Tura dei ban dawa ruh ba bha noh la jong ka mang tyngka na ka bynta ka Garo Hills bad ka Khasi Jaiñtia Hills”, u la ong, da kaba bynrap ba ki jingmih na Garo Hills yn pyllut na ka bynta ka Garo Hills bad ka jingmih na Khasi Jaiñtia Hills dei ban pynlut beit ha Khasi Jaiñtia Hills bad ïa ka mang tyngka na ka sorkar pdeng ruh dei ban ïasam katkum ka jingheh ka jaka bad ka jingbun briew.
Halor ka jingpyntieng jong kiba bun ba lada pynkhih ïa kane ka Polici bhah kam ka lah ba shah pynwit ne pynduh ha ka ïingbishar, u Bah Robert u la ong ba ym lah ban shu shim ïa ki kyndon jong ka aiñ ne ki rai jong ka ïingbishar tang ba sngewbiang ïalade, hynrei hap ban peit lang ïa kiwei ruh kiba don ka jingïadei ne kiba ïarap ban pynbha ïa kane ka Polisi bhah thungkam.