Meghalaya State League: Pynliem ka Riangdo Youth SS&CA da 4 – 1 kol ïa ka Lumdiengngan SC
![](https://mawphor.com/wp-content/uploads/2022/04/Sports-750x430.jpg)
Mawkyrwat, Jymmang 29: Ka lympung ïalehkai jong ka Meghalaya State League 2023 kaba la long hapoh madan Artificial Turf, MDSA, South West Khasi Hills District ka la nang ïaid shakhmat ha kaba mynta ka sngi ka la poi ha ka wat ba khadduh jong ka Round – 4 bad ki kynhun la ïalehkai ki long ka Lumdiengngan Sports Club pyrshah ïa ka Riangdo Youth SS&CA.
Ha kaba phai ha ka jingïalehkai, ka jingïakhun hapdeng ki ar kynhun ka la long ka jingïalehkai ba itynnad ha kaba ki ‘rangïalehkai jong ka Lumdiengngan SC bad ka Riangdo Youth SS&CA ki la ïaleh da kaba ki don ka thong ban pynpoi ïa la ka kynhun sha ka jingjop. Hynrei hapdeng jong ka jingïalehkai ka Lumdiengngan SC ka la ïoh ban thep nyngkong ïa ka kol ha ka minit kaba 36 na u Stepping Stone Wanshnong bad bud sa ka kol jong ka Riangdo Youth SS&CA ha ka minit kaba 40 na u Bansynshar Iawphniaw, nangta na u Sylvester Thongni ha ka minit kaba 42 ha kaba ïa kine ki kol ki la ïoh ban thep ha ka jingïalehkai jong ka kyllastep.
Haba wan phai sa ha ka jingïalehkai jong ka kyllamiet pat, na ka liang ka Riangdo Youth SS&CA ka la ïoh ban ïalehkai khambha shuh shuh bad ka la ïoh biang sa ki ar tylli ki kol kata na u John Kerry Wanniang ha ka minit kaba 49 bad kumjuh ruh ha ka minit kaba 86 shwa ban kut ki minit jong ka jingïalehkai.
Namarkata, ha kane ka jingïalehkai kaba la long mynta ka sngi kaba dei ka Round – 4 ka Riangdo Youth SS&CA ka la jop noh da 4 – 1 kol pyrshah ïa ka Lumdiengngan Sports Club.