Tar ka HITO ïa ka shithi khot ïakren ka Sorkar MDA halor ka Reservation Roster System

Shillong, Jymmang, 28: U President jong ka Hynñiewtrep Integrated Territorial Organisation (HITO) u Bah Donbok Dkhar ha ka Sngi U Blei u la tar lyngkhot lyngkhai ha ka jaka shah jingit jong u President ka VPPP u Bah Ardent Miller Basaïawmoit ïa ka shithi ba la phah da ka Sorkar Jylla sha ka seng ban khot ïakren halor ka Reservation Roster System.
“Na ka liang jong ngi, ngi kyntait bad ngim treh ban leit namarba ka seng ka ieng hi ha ka nongrim,” ong u Bah Donbok Dkhar ha ka jingïakren bad ki lad pathai khubor.
“Ka HITO ka phah ïa u kyrwoh sha ka sorkar, kumba ki paidbah ki la tip ba ka HITO ka ieng skhem ban dawa ban khmih bniah ïa ka Reservation Policy, hynrei kaba sngewphylla pat ba kane ka Sorkar dang hynnin ka sngi (Saitjaiñ) ka phah ïa kane ka shithi sha ka ophis jong ngi ban ïakren halor ka Reservation Roster,” la ong u Bah Dkhar.
“Ngin ieng skhem beit ban dawa ban khmihbniah ïa ka Reservation Policy. Wat nym pynbiej ïa ngi ki khun samla ka Bri u Hynñiewtrep, namarba ki paidbah ka ri Khasi ki mynjur ban khmih bniah ïa ka Reservation Policy hynrei kane ka Sorkar ka kwah ban shu pynslem bad ka thung da ka Komiti kaba la khlieh da ka Myntri Sorkar ka Dr. Ampareen Lyngdoh kaba la kren teng ïa ka State Reservation Policy ha u snem 2018 bad ha u snem 2022 bad kumjuh ruh u Bah Himalaya M. Shangpliang uba la kren ba dei ban khmih bniah bad ban pynbeit. Haba kito ki shong hangto ngin dang shahniah ïa kum kine ki briew? Hato ngin dang shahniah ïa kane ka Sorkar? Hato ngin sa phai dien biang kumba ka la long ha u snem 2013 ha ka por ba ngi dawa ïa ka ILP,” la buh jingkylli u Bah Donbok.
“Lada ka Sorkar ka kwah ban pynbeit ka dei ban khot ïa ka VPP ban ïakren ïa ka Reservation Policy bad kata ka dei ka lynti, hynrei phin khot ïa ngi ki sengbhalang ngim dei ma ngi ki nongïasaid aiñ hynrei ki dei ki Nongmihkhmat ba la jied bad ngi la pynjop ki dei kita keiñ. Kin khot leh aiu ïa ngi, kin shu pynsngew namarba ngi tip shai ïa ka jingbuittuh jong ka Sorkar MDA,” u la bynrap.
U la kynthah ruh ïa ka Sorkar ha ka por ba la khot ïa ki kynhun bapher bapher halor ka jingïakren pynbeit ïa u pud u sam da kaba shu pyntip beit ïa kaei kaba ladep pynkhreh lypa.
“Phi lah ban pynbiej ïa ngi shisien hynrei phin ym lah ban shu pynbiej sah ïa ngi. Ngin ym leit bad ngin pyneh beit bad ngi kyntu ïa kiba la shah khot sngewbha (ha ka sorkar) ba kin ym leit namarba kane ka dei ka ïap ka im jong ka ri bad ka jaidbynriew,” la kyntu u President ka HITO ïa ki para sengbhalang.