Khliehriat jymmang 27: U President rangbah jong ka Jaiñtia Students Movement, u bah L.S.Rymbai, u buh ka jingkylli ïa baroh ki samla pule Pnar da kaba ong “Ko samla pule Pnar, hato phi donkam ne em ïa ka Rersevation Policy kaba paka, kumba donkam ki samla pule Khasi, lada phi donkam, mih paidbah ha ka sngi nyngkong”
“Lada phi ki samla pule pnar phi sngew donkam ïa ka Reservation Policy ban ïoh kam ïoh jam ban ïoh ka bhah ba biang ha ka pule ka puthi phi dei ban iasnoh kti lang ha kane ka jingiakhun jong ngi,” bynrap shuh shuh utei u President ka JSM.
“Lada ki samla pule Pnar kiba pule ha ki higher secondary schools bad ha ki college kiba don ha ri lum Jaiñtia, lada ki sngew donkam shisha ïa ka Reservation Policy, ki dei ruh ban ïa mih paidbah na la ki skul bad kolej da la ka mon sngewbha ha ka 29 tarik mynta u bnai, ban wan ban ïa shim bynta lang ha ka shong kyllaiñ myngngor kaba yn pynlong ha Jowai, ba la khot pynlong daka JCCRP, ka kynhun synrop ba kynthup ka Jaiñtia Students Union,Jaiñtia Students Movement, Jaiñtia Youth Federation, ka East Jaiñtia National Council bad ka Synjuk Ki Waheh Shnong Jowai lem bad Ka Synjuk Ki Waheh Shnong Ri Jaiñtia”
U la ong ruh ba ki samla pule kiba naduh ka kyrdan pule Class XII shaneng ki dei ban pyrkhat sani bha, namar hato kan myntoi aiu ban pyndep ïa ki jingpule lada kim ïoh kam sorkar, namar kumba long mynta 40% u Khasi Jaintia bad 40% u Garo.
Ha kajuh ka por, utei u nongialam jong ka JSM u la byrthen ïa ki MLA kiba ju kren lap lap kiba ju ong ba ki samla ki dei ban seng la ki kam la jong ba ym dei ban ap ïa ki kam sorkar, halor kane u bah Rymbai u la kynthoh jur da kaba ong ruh “Hato mynta yn seng kam aiu?? lada ïa ki kam contract la pyniaid (monopolize) lut da ki kompani shimet jong ki nongmihkhmat (politician).
“Kumba long mynta ha kane ka Roster system kaba la pyntreikam naduh u snem 1972, ki samla Garo ki long kiba ïoh nong katba ki samla Khasi Jaiñtia pat ki duhnong, watla ngi don haduh 36 ngut ki MLA Khasi Jaiñtia ” pynkut u kyrwoh.
