Pynkup burom ka KSU ïa u Addiel J. Surong uba la ïoh bat ïa ka kyrdan ba 20 ha ka Eksamin SSLC

Shillong, Jymmang, 28: Ka KSU Mawprem Circle hapoh ka jingïalam jong u Asst. Education Secretary u samla Pynshngaiñ Lyngdoh bad u Litigation Secretary u samla Basuklang N. Khongwar ryngkat bad ki dkhot ha ka sngi Saitjaiñ ki la leit ban ai khublei kyrpang ïa u samla Addiel Johanan Surong uba la ïoh ban bat ïa ka kyrdan ba arphew ha ka Top Ten jong ka eksamin SSLC 2023 kaba la pynbna da ka MBoSE dang shen.
U samla Addiel Johanan Surong u dei u khun khatdduh jong ka Kong Bandona Surong bad u Bah Cornelius Laloo kiba shong basah hapoh ka shnong Lower Mawprem, Pdengshnong bad u dei u khynnah skul jong ka Government Boys’ Higher Secondary School, Shillong.
Ka jing leit jngoh jong ki dkhot ka seng ha ka ing sah jong une u samla, ka long ban leit ïa kynduh ïa ki kmie ki kpa bad ïa ki bahaing baroh ban ai mynsiem bad ban kitbok kitrwiang ïa une u samla ba un nang ïai kynjoh sha ki kliar lum jong ka Nam.
Na ka liang jong u samla Pynshngaiñ Lyngdoh haba ai jingkren u lah ong, na ka liang ka seng hi, kan nym lah ban ai da ka pisa lane ngin ai ïa phi da ka spah ka phew, hynrei kaei kaba ngi ai ha phi mynta ka long tang ka jingai mynsiem bad ka jingsnohkti lang na bynta ka lawei ban phyrnai.
U la ong ruh ba ka jingkhublei ka leit sha ki kmie ki kpa kiba la ïaleh dohïap ban pynbiang ba un sa ïoh kheit ïa u soh ka jingjop. U la pynpaw ruh ba ka long kaei kaei kaba sngewsarong ïa ka shnong bad khamtam eh ïa ka ri bad ka jaidbynriew hi baroh kawei.
U la ban biang ruh ba ynda u samla Surong u la jam sha ki kliar lum jong ka nam um dei ban klet ïa la ki kmie ki kpa bad ki nongleh bha. U la ong ruh ba kam pher lada un long u nongïalam niam lane u nongshong iew ne u nongtrei Sorkar hynrei ban ïai kynmaw ban buh hakhmat shwa ïa la ka jaidbynriew hakhmat eh.