Nongpoh, Jymmang 27: Kum ka jingpyrshah ïa ki jingdih ba sniew bad kiwei kiwei ki jingdih pynbuaid kiba ktah ïa ka koit ka khiah jong ki briew, ka ophis u District Medical & Health Officer ka Ri Bhoi ryngkat ka bor synshar district jong ka Ri Bhoi mynta ka sngi ki la pynlong ïa ka jingrakhe ïa kata ka Word Tobacco Day ba la pynlong ha ïewmawlong ha Nongpoh.
Ha kane ka jingrakhe ïa kane ka World Tobacco Day la wan ban shim bynta lang da u Bah Mayral Born Syiem, MLA ka Nongpoh kum u kongsan bad la sakhi lang ruh da ka jingdon lang u Bah W.R Massar, Asst. Commissioner, u Bah P.S Marwein DSP ka Ri Bhoi, Dr. W.Mawrie, District Nodal Officer, NOHP, NTCP, Dr. I.Tiewsoh, Dental Surgeon bad kiwei kiwei ki ophisar na ka District ryngkat ki paidbah.
La rakhe ruh ïa kane ka World Tobacco Day halor ka phang “My Meghalaya, Free Tobacco Meghalaya.” Kaba dei kawei na ka thong ban ïa khun pyrshah ïa u duma bad kiwei kiwei ki jingdih ba sniew kiba ktah ïa ka koit ka khiah jong ki paidbah.
La sdang ruh ba rakhe ïa kane ka World Tobacco Day da ki nongai jingkren bapher bapher kiba la kren halor ka jingma bad ka jingktah jong u duma bad kiwei ki jingdih basniew bad na ka liang u Ma Rangbah kum uwei u Utuber ba kham paw u la ai ïa ka drama lyngkot ban pynpaw halor ka jingma jong u duma bad kiwei ki jingdih basniew.
Haba ai jingkren lamphrang halor kane ka sngi, ka Dr. I. Tiewsoh ka la kren halor ka jingma jong u duma bad ka jingdonkam ban ai jinghikai sha kiwei ba ki dei ban kiar na kaba bam ne dih ïa u duma bad khamtam ba ki paidbah kin ai ka jingïatrei lang na ka bynta ban ïa snoh kti ha ka jingïaid paidbah, ki signature campaign kaba long kawei na ka thong ban ïalap halor ka jingma jong u duma.
U Bah P.S Marwein, u DSP ka Ri Bhoi haba ai jingkren u la batai shaphang kiba bun ki kyndon kiba dei shaphang kata ka Cigarettes and Other Tobacco Products Act (COTPA) ba la pyntreikam da ka sorkar kmie ba bun ki pynkheiñ ïa ki kyndon nalor ba ki la tip ba ka jingdih duma ka ktah ïa ka koit ka khiah jong kiwei.
U la batai ruh halor ka jingdonkam ban pynduh noh ïa ka jingdih duma ha ki jaka paidbah, ban pynpaw pyrthei ïa ka shap jong u duma bad kiwei kiwei ki lad ki lynti kiba ïarap bad pynshlur ban pynmih bun ïa u duma.
Shuh shuh, u la ong ruh ba katkum ki kyndon jong ka sorkar la khang pyrshah ruh ïa ki dukan ba die duma ba kim dei ban die ha jam ki jaka pule bapher bapher bad la kumno kumno ka dukan ka dei ban don ka jingjngai kumba 300 phut sawdong bad kino kino kiba pynkheiñ ïa kine ki kyndon kin sha pynshitom katkum kitei ki kyndon jong ka aiñ.Ha kane ka sngi la ai jingkren ruh da u Bah Mayral Born Syiem uba long u MLA ka Nongpoh, ha kaba u la ïa ka jingïaroh ïa ka tnad ka koit ka khiah kaba la shim khia ban pynlong ïa kane ka jingrakhe ïa kane ka World Tobacco Day kaba dei na ka bynta ka jingmynto ki paidbah ba kin sngewthuh ba u duma u long u jingdih basniew ba ktah ïa ka koit ka khiah jong ki paidbah.
Kum u nongmihkhmat paidbah u la pan ruh ka jingkyrshan na ki paidbah ba ki dei ban ai ka jingïatrei lang ba ka tnad ka koit ka khiah na ka bynta ban ai jinghikai sha kiwei halor ka jingktah jong u duma bad ha kawei ka bynta ban pynshlur ïa kiwei ba ki dei ban sangeh noh ban dih duma la dei ba ka sorkar kan buh ruh ki kynja khusnam ïa kito kiba lah ban sangeh dih ne bam duma khnang ba ngin lah ban poi sha ka thong na ka jingktah jong u duma, u la bynrap.
