Nongpoh, Ïaiong 27: Ka eriong ba jur kala khyrwit biang ha kiba bun ki shnong ha Ri-Bhoi hynnin ka miet shiteng synñia bad bun naki longiing kila shah ktah biang haka eriong bad shah pynjulor ki iing ki sem bad ka shnong Umwang kadei kawei naki shnong bala shah ktah jur na katei ka eriong.
Kumba 4 tylli ki longiing kila shah ktah jur haka shnong Umwang bad kawei ka skul naka jingkhyrwit jong ka eriong kaba la rah ïaki tin sop iing bad kumjuh ruh kawei ka longiing kaba ioh iaka skhim ba duk kala shah ban ha uwei u dieng na tnum jong ka iing bala wanrah ka jingjulor.
Halor katei ka jingshah ktah ki longiing naka jinglyngshop ka eriong naka liang ka National People’s Party Nongpoh Block haka jingïalam jong u Bah Plielad Tiewsoh President bad u Bah Lawrence General Secretary mynta ka sngi kila hiar sha katei ka shnong ban leit jurip bad aiti ruh da ki tin sopiing sha ki longiing ba shah ktah jur eh bad kumjuh ruh kawei ka LP School.
Haba kren sha ki lad pathai khubor u Bah Plielad Tiewsoh President ka NPP Nongpoh Block u la ong ba kum ka seng ka dap da ka jingsngewkhia kaba jur halor ka jingshah lyngshop ki longing ha katei ka shnong bad mar mar haka jingïakren bad ka kong Macdalyne S Mawlong kaba dei ka kyrtong na Nongpoh Constituency kala kular ban phah jingïarap da ki tin sopiing sha kitei ki longiing ba shah ktah jur eh naka bynta ba kin ioh pat ban maramot ïaki iing ki sem jong ki.
Naka liang ka shnong Umwang kala pynpaw ka jingsngewkmen ïaka seng NPP kaba la noh synñiang da ki tin sopiing sha katei ka shnong naka bynta ki longiing ba la shah ktah jur eh naka jingwan lyngshop jong ka eriong.
