Hadien ba ïoh ki jingujor, leit ïakynduh ka KSU ïa ki nongtrei ka Ïing Dak ha Mawkyrwat

Mawkyrwat, Ïaïong, 27: Ka Khasi Students’ Union (KSU) jong ka Mawkyrwat Circle mynta ka sngi ka 27 tarik u Ïaïong, 2022 ki la leit ban ïa kynduh markhmat ïa ki nongtrei jong ka Ïing Dak ne ka Mawkyrwat Sub Post Office ha Mawkyrwat ban wad jingtip kaba thikna halor ka jingud jingnam jong ki paidbah kiba leit donkam ha kane ka jaka ba la kynnoh ba ka don ka jingdkoh bad suki ha ki rukom treikam.
Kumta halor kane, na ka liang ka seng hadien ba ka la ïoh ban ïa kynduh markhmat ïa u Sub Post Manager jong ka Mawkyrwat Sub Post Office, bah B. Dura u la ïathuh ba u la pynpaw ba ka jingsuki ban treikam ka long na ka daw jong ka jingthut jong ka bording, ka network bad kumjuh ruh ka link ha ka ban pynbeit ryntih ïa ki jingdonkam kum ki transaction kiba ïa dei bad ka pisa pilaiñ jong ki paidbah nongpyndonkam.
U Ïengskhem Syiemlieh, Vice President ka KSU Mawkyrwat Circle, haba kren ha ki lad pathai khubor u la ïathuh ruh ka jingthut jong ka link hapoh kane ka ophis treikam katkum ka jingtip jong ka seng, la ong ba ka la thut naduh u snem uba la dep ha ki bnai Risaw, balei pat haduh mynta kim pat lah ban leh ei ei??
Namarkata, ka seng lyngba kane ka phah ruh ka khubor sha ki bor ba dei peit jong kane ka tnad treikam ne ka khlieh duh jong ka Ïing Dak (Post Office) ba kam dei ban hun ban shu ap tang ka jingujor hynrei ka dei ban pynbiang bad peit ïa kita ki jingduna baroh khnang ba ki paidbah nongwan donkam kin nym ïa kynduh jingeh kumba jia ha kine ki sngi kiba la leit bad haduh kane ka sngi ba mynta.
Ha kajuh ka por ka seng ka phah ruh ka khubor sha ka sorkar ba kam dei ba shu peit kai lada don kino kino ki jingdawa ban pynbiang ïa ki jingdonkam jong ki paidbah hynrei dei ban peit lem ban pynbiang ha ka rukom kaba dei khnang ba kan nym buh jingeh hadien habud.
U la ong ruh ba ha kine ki sngi ban sa wan ka seng kan sa leit ruh ban ïa kynduh bad ai jingthoh ruh sha ka Deputy Commissioner, South West Khasi Hills District bad kumjuh ruh sha ka Head Office ha Shillong ban pyntip halor kane ka bynta khnang ba kin leh ïa kaba donkam.
Ha kane ka sngi la synrang ruh da ki dkhot jong ka KSU Mawkyrwat Circle.