Nongpoh, Jymmang, 21: Hadien ka jingpynthikna na u District Animal Husbandry and Veterinary Officer, Ri-Bhoi District, u District Magistrate jong ka Ri-Bhoi u la pynjari da ka jingkhang dam (Containment Zone) ha ki saw tylli ki shnong ha Ri-Bhoi District kiba kynthup ïa ka shnong Umsawriang, Madan Nonglakhiat, Mawlyngkhung bad Syllei-u-lar naduh ka 16 tarik tad haduh ban da pynbna da kumwei namar ka jingjur jong ka jingpang African Swine Fever (ASF) lane ka khlam sniang kaba la wanrah ruh ka jingiap jong ki sniang ha kine ki shnong.
Ki bor synshar distrik ki la shim ruh ïa ka rai ban khang dam ïa kitei ki shnong khnang ba ki doktor na ka tnad Veterinary kin lah ban wad bniah ban lap ïa ki sniang ba don jingpang ha kitei ki shnong.
U District Magistrate u la mana ruh ïa ki paidbah ba kim dei ban thied sniang na ka bynta ban shohdoh bad ban die ïa ka doh sniang ha kitei ki shnong bad baroh ki nongri sniang ki dei ban leh khuid bad kim dei ban shah ïano ïano ban rung sha ki sem ri sniang jong ki.
