La khang ban wanrah symbai sniang bad sniang shohdoh na kiwei pat ki District: DC

Mawkyrwat, Ïaïong 27: Ka Deputy Commissioner jong ka South West Khasi Hills District, kong C. Kharkongngor, IAS ka ai ka jingpynbna paidbah ba katkum ka jingpynbna (Notification Order) jong ka Sorkar Jylla 26 tarik u Ïaïong, 2022 la pyntip sha baroh ba ka la don ka jingïap ki sniang na ka jingpang African Swine Fever (ASF) ha ka shnong Umshorshor, Umsning Block, Ri Bhoi District.
Namarkata, khnang ban khanglad ne ban ïada ïa ka jingpur sted bad saphriang jong kane ka jingpang la mana ïa baroh ki nongri sniang, nong-ot dohsniang bad ki ‘riew paidbah ba ïa mynta shipor ym bit ban wanrah symbai sniang, ne ban ot-doh sniang na kiwei pat ki distrik tad haduh ban da pynbna da kumwei pat.