Ki doktor bad kiwei pat ki nongpynkhiah ki ong ba mangi ki briew ngi donkam 7-8 kynta ka por ban thiah khnang ba ka met ka phad jongngi ka lah ban pynthymmai biang ïalade na ka bynta ki kam kiba ngi dei ban trei ha kawei pat ka sngi. Ki stad saïan ki ong ba ka met jongngi ka donkam la kumno kumno 7 kynta ka jingïohthiah kaba jylliew bha. Kata ka mut ban ïohthiah khlem shah pynthut hano hano ruh lane na ka daw jong kano kano ka jingpynwit kum ka jingsawa lane ka jingriew jong ki mobile phone shiteng synïa.
Hynrei naduh ba la mih kita ki smartphone lane ki phone ha kiba ngi lah ban peit ïa ki dur khih (phlim), ban peit bad sngap khubor na ki bun tylli ki lad pathai khubor, ban sngap ïa ki jingrwai jingsiaw, ban peit ïa rynsan social media kum ka Facebook, Instagram bad Twitter. Haba ngi lah buh ïa kino kino ki dur ne ngi thoh ïa kiei kiei kiba ngi sngew dei ban ïa pashat lem sha ki paidbah, ngi kwah ruh ban tip kato ngut ki briew la la pule ïa kata lane ki lah “like” (sngewïahap) bad ka jingthoh jongngi ne ki dumok pynban ïangi namar kim sngew ïahap ïa kaei kaba ngi thoh. Kane ka jingkwah tip ïa ka jingsngew jong kita kiba “follow” lane kiba bud ïa ki jingthoh (posts) jongngi ka lah kylla long kum ka jingbuaid namar ngi peit sha ki smartphone khliak shi khliak ïoh don bao ng kumno re kumno. Tang shu lah riew ka smatphone tiak ngi lah kwah peit noh bak-bak wat la ngi don lang bad ki paralok ne ha ka klas ne haba marwei. Kane ka pynthut eh ïa ka jongkhreh kot ki heprit bad ki samla jongngi. Sa kawei ruh la long ba ngim lah pynleit jingmut shuh ïa kaei kaba ki nonghikai ki kren bad batai ha klas.
Ïa kane ki stad saïan ki khot ka smartphone addiction lane ka jingshah the mraw ha ka smartphone. Kaba kham don jingma ka long ba bun kiei kiei kiba wan ha ka smartphone la ki dei ki khubor YouTube kiba khlem da tip thikna ïa ka tynrai khubor (fact-checking) ki nongpynïaid YouTube ki la buh noh kloi kloi ïa kata ka khubor tang ban lah die, namar mynta ka khubor ruh ka la kylla long kum ka tiar die ha ïew ha hat (news as a commodity).
Mynta lah katto katne sien ban ga leit ai jingkren ha ki skul bah (University) nga ïohi ba ki khynnah pule ki lah shoh samthiah lypa khlem pat sdang ka jingkren. Don kiba shaniah ha ka tyrpeng ki paralok jong ki bad ïohthiah kynjai. Tip ki kmie ki kpa ki tip mo ïa kane ka jingduh thiah duh dem ki khun jong ki ha ka por thiah mynmiet bad ka jingsamthiah jong ki ha ka por mynsngi mynshai.
Ngi dei ban kynmaw ba ïa ka met jongngi ki briew lah saiñdur ha ka rukom na ngi dei ban thiah ha ka por miet ba ban peitmat ha ka por mynsngi namar ngi ha ban trei kam trei jam; ban leit rep; ban leit ïew leit hat; ban peh ïa ka pule ka puthi bad kumta ter ter. Ka met jongngi ki briew ruh lah saiñdur ba ka dei ban ïoh ïa ka thiah ka dem kaba biang ha ka por mynmiet khnang ba ka lah ban pynleit jingmut ïa ki kam ki kam bad pyntrei kami a ka jabieng ha ka por mynstep, mynsngi. Mynta pat lah kylla pyrdet lut baroh.
Ki khun samla bad katto katne ki rangbah ruh kim lah shuh ban bthat ïalade na ka smartphone wat haba ki lah kiew ha jingthiah ruh. Teng teng don kiba pyndonkam ïa ka smartphone haduh 2-3 baje mynstep. Kat ban ïohthiah lah dap 4 baje mynstep. Ki khie pat ynda lah 11-12 baje shiteng sngi. Bun kibym lah shuh wat ban beh ïa ka kam ka jam ne ka jingleit klas jong ki. Ki hiar ha ka jingpule namar bym lah pynleit jingmut shuh ha ka kot bad kiwei ki jinghikai. Te pyrkhat kein haduh katno kane ka jingbuaid smartphone ka ktah ïa ka koit ka khiah ym tang jong ka met hynrei khamtam eh ïa ka jingmut jingpyrkhat (mental health). Ki kmie ki kpa bapli imat kim lah shuh ban the lakam ïa la ki khun namar bunsien ki samla ki ong ba ki hap ban peit ïa ki jingthoh bad ki jingbatai ha ka internet na ka bynta ki project jong ki. Ki kmie ki kpa kiba kham duna ka pule ïalade ki shu ngeit beit katba ong ki khun. Ym lah ban tip kane kan ktah haduh katno ïa kane ka juk kaba mynta hynrei tang kawei ka jingma ka ap bad kata ka long ba ngi kum ki briew ngim lah shuh ban pyrkhat bniah (clear thinking) halor kano kano ka phang namar ba ka jabieng kam trei kam bha shuh.
Mynta lei lei la mih sa kata ka Artificial Intelligence lane ka jingstad kaba da ki mashin ha kaba ki briew kim donkam shuh ban pynïaid kam ïa ka jabieng pyrkhat lajong. Dang ha kine ki sngi ka la mih sa kata ka App ChatGPT kaba mut ba lada phi don ïa kata ka App ha ka smartphone jongphi bad phi ong ïa kata ka App ba ba kan thoh ïa kano kano ka project kaba lah phah ïaphi na skul/kolej/skulbah kane ka lah ban pynthoh tang hapoh 5-10 minit. Ka shong haphi ba phi pynrung ïa ki kyntien aiu ha kata ka App ChatGPT.
Ki stad saïan ki ong ba kane kan sa wanrah shibun ki jingkylla ha ka jingling jongngi ki briew. Hynrei lada ngi sngewthuh ïa ki jingma kiba ap ïangi da kaba pyndonkam palat ïa ka smartphone katba ngi klet noh ban pyndonkam ïa ka jabieng kaba U Blei u la ai, ka por kan poi ba ngin shah pynïaid ha kine ki kor ki bor mashin bada kata ka lah ban poi shaduh ki thma bah pyrthei ruh.
Ïa ki mashin komputor lah shna da u briew. Kane ka dei ban long ka shakri, ym ka kynrad. Kumjuh ruh ka smartphone. Lada kine ki mashin ki sdang ban synshar ïa ka kam ka jam bad ka jingmut jingpyrkhat jongngi te ka jingma kaba khraw ka ap ïangi.
