Khliehriat jymmang 21: Halor ka mukutduma ba la buh hakhmat ka iingbishar Meghalaya High court, da u Phon Lyngdoh bad ki saw tylli ki Seiñ Raij Shnong kiba don hapoh ka elaka Rymbai, ka iingbishar ka la pynmih ia ka hukum ba yn pynsangeh shwa ia ka jingpynlong ia ka election ban jied Doloi ha eleka Rymbai.
Ka JHADC, haba pynbna ia ki kyndon ialeh election Doloi, ka la ong ba ki don ki kur kiba don hok ban ialeh ia kane ka election tangba ym shym la kdew la ki dei na kano kano ka jait niam.
Na ka liang u muktiar jong ka JHADC, u la ong ba naduh mynshwa ki la don kiba long Doloi kiba dei ruh na ka niam kristan, kum u Doloi Ri Swer uba la shah jied ha ka 27 tarik u rymphang 1975, u Doloi Batskhem Lyngdoh, 25 u jymmang 1993, u doloi, Elious Swer ba shah jied ha ka 20 tarik u nailar 2014, ka hukum kaba la pynmih da ka JHADC myn ha ka 19/4/2023 kam shym don kano kano ka jingduna ha ka, pynpaw u muktiar.
Katba na ka liang u muktiar uba na ka liang kiba ai mukutduma, u la ong ba ia ki kam u doloi hapoh ka elaka rymbai ki don ar jait, kawei ka dei ia ka synshar ka khadar bad kawei pat ka dei ban pyndep ia ki kam niam, da kaba la nuksa ba ha u snem 2015 u Doloi u khlem leh ia ki kam leh niam ha kaba u la phah da kiwei pat ki briew ha ka jaka jong u na ka daw ba u dei u kristan, kane ka la pynbitar ia ki paidbah namar ia ki kam dei ban pyndep da u Doloi.
La ong shuh shuh ruh ba ka District Council kam shym la pyrkhat bha ha shwa ban pynmih ia ka hukum ban pynlong ia ka election jied doloi bad lada iaid shakhmat kan sa wanrah ia ka jingthut ha ka shongsuk shongsaiñ.
Halor kane ka iingbisar ka la ong ba na ka daw ba ka District Council ka khlem kdew ia ki kyndon ba donkam ha kaba ki seiñ niam tre ruh ki la pynpaw ia ka jingpyrshah ia ka hukum ka District Council kaba khlem pyrkhat lem ia ki kamram kiba iadei bad ki niam tre.
Kumta ka donkam ban hap bishar biang ia ka mokotduma bad yn shong ban bishar biang ha ka 27 tarik u jylliew 2023.
