Nongstoiñ, Jymmang, 21: Katto katne sngi hadien ba u Syiem ka hima Rambrai u la ïohi ha kawei na ki kot khubor Khasi kaba ‘dated 18 tarik Jymmang 2023’, kaba u la shah kynnoh ba u Syiem bad ka ophis jong u ki la ai ‘No Objection Certificate’ ban ksam marpoh khyndew ha Mawlangria da ki katto katne ki briew ryngkat bad ki nongtrei jong ka Shree Shree Mining Corporation Limited, u syiem ka hima Rambrai lyngba u kyrwoh ba la phah mynta ka sngi, u la pynshai ba ka jingai No Objection Certificate kam dei na ka bynta ban ksam marpoh khyndew. Hynrei, la ai NOC ïa ki trai jaka katkum ki dulir ïadie ïathied ym ba ka ophis ka ai NOC ban tih marpoh khyndew.
U Syiem Bah Order Syiem lyngba ka kyrwoh u la ong ruh ba ka ophis u Syiem ka la maham ruh ha ka NOC ba ki trai khyndew jong ka Mawlangria kim bit ban die ne aiwai ha ki bar jylla. Nalor kata la ong ruh ba ka jingkynnoh ba u Syiem u la ai NOC khlem kheiñ ïa u paitbah ba bun ba lang tang ban myntoi shimet, u don ban pynshai ba lada uno uno u nongshong shnong uba dei napoh ka hima u wan ban pan ïa kano kano ka NOC, u Syiem bad ka Ophis jong u kim ju shim pisa wat shi tyngka ruh.
U la ong ruh ba katei ka jingkynnoh ïa u Syiem ka lah ban long ka jingbym tip ïa ka jingshisha. Lada kata ka NOC kaba la ai ha ki trai jong ka khyndew ha Mawlangria ka ktah ïa u ba bun ba lang, ka imlang sahlang bad ka jingkoit jingkhiah, ka ophis ka kloi ban pyndam noh ïa katei ka NOC ba la ai sha ki trai jong ka khyndew ha Mawlangria.
Haba phai sha kane ka mat ka don ka jing sngew artatien kaba jur namar ki No Objection Certificate ba la ïoh copy da u nongthoh khubor ki don lai tylli. Kawei na ka ophis jong u syiem ka hima Rambrai kaba No/ Rs/ 11 /2021-22 Dated Rambrai The 25th Jan 2022, kaba kdew ba ka ophis u syiem bad ka dorbar kam don kano kano ka jingujor ban tih ïa ki marpoh khyndew na katei ka jaka, katba ki sngew bit jong ki kum ki trai jaka. Lait noh ba kin die ne aiwai sha ki bar jylla bad ïa katei ka NOC la soi bad la kynthah muhor da u Syiem ka hima Rambrai.
Kawei pat ka NOC ka dei na ka Dorbar shnong Mawdoh kaba Dated Mawdoh The 30.12.2021, kaba katei ka Dorbar shnong kam don jingujor ei ei halor ka jingthmu jong u bah Makdonal ban phah Register na ka bynta ban tih marpoh khyndew na katei ka jaka bad ïa katei ka NOC la soi bad shon muhor da u Redyson Wahlang sordar shnong Mawdoh Rambrai Syiemship.
Kawei pat ka NOC ka dei kaba la aid a ka Dorbar shnong Mawïawtep kaba Dated Mawïawtep The 17/01/2022, kaba kdew ba kam don kano kano ka jingujor halor ka jingthmu jong u bah Makdonal Lyngdoh ban Register bad ban tih marpoh khyndew na katei ka jaka bad ïa katei ka NOC la soi bad shon muhor da u Rowel sordar shnong Mawïawtep bad la soi lang ruh da u secretary ryngkat ka muhor jong u.
