Shillong, Jymmang, 20: Kawei ka longkmie Khasi ïa kaba la tip kyrteng kum ka Kong Bek Khongngaiñ, 58 snem ka rta kaba dang leit thied leit pet sha Ïewduh ha ka sngi Saitjaiñ ka la shah thombor ha uwei u bar jylla uba la kura na ki bynta jong ka khlieh bad kynjat ruh ïa ka na shadem.
Katkum ka jingïathuh jong ka khun kynthei, ka Kong Bek ka la shah thombor ha u bar jylla u bym shym la tip kyrteng satia ha ka por kumba 10:00 baje haduh 10:30 baje mynstep.
Ka khun kynthei ka la ïathuh ba ka Kong Bek kaba ju shong die jhur ha ïew Rynjah ka la leit thied jhur sha ïew dielang ha Ïewduh shwa ban plie dukan hynrei kane ka longkmie ka la ngat pynban ha ka jingshah thombor ha u bar jylla.
Ka la ïathuh ruh ba ym shym la don mano mano ruh napdeng ki nongdie jhur ha ïew die lang ki ban ïarap ïa ka Kong Bek hadien ba ka la shah thombr da kaba aidaw, “ha kum kane ka por ba don ki jinghuri hura ïoh duh ei ban die jhur.”
Ïa une u bar jylla la kem noh da ki Pulit jong ka Mawlonghat Beat House bad na ka liang jong ki bahaing hasem ki la ujor da ka ejahar ha ki Pulit jong ka Mawlonghat BH bad hadien kane la bthah pat ïa ki bahaing hasem ban ujor biang sa ha Shillong Sadar Police Station.
Ïa ka Kong Bek kaba la mynsaw la pynkit noh sha Civil Hospital Shillong bad hadien kane la pynkynriah sha Super Care Hospital.
