Kynnoh ka KHNAM ba pyrshang ïalam bakla u MP ka Rajya Sabha halor ka Roster System

Shillong, Jymmang, 20: U Vice President jong ka Khun Hynñiewtrep National Awakening Movement (KHNAM) u Bah Thomas Passah u la kynnoh ba ki nongïalam jong ki seng saiñpyrthei bad u MP ka Rajya Sabha u Dr. WR Kharlukhi uba long ruh u State President jong ka National Peoples Party (NPP) ki la pyrshang ban ïalam bakla halor ka Roster System tang shu kut ka jingïalang jong baroh ki seng saiñpyrthei ba la khot pynlong da ka Sorkar Jylla ha ka sngi Thohdieng.
“Katkum ka jingïohi jong ngi ka dei ka jingthok ka jingshukor namarba ka Sorkar ka la pyrshang ban pyntreikam ïa ka Roster System shadien. Balei ngi ong kumta, ha ka jingïalang hynnin ka sngi haba ki pynkhreh ïa ki Data bad ïa ka Roster Register ki kdew naduh u snem 1972. Ka pynpaw ba kane ka Roster System ka dei kaba treikam shadien bad kam treikam shakhmat” ong u Bah Passah ha ka jingïakren bad ki lad pathai khubor ha ka sngi Saitjaiñ.
“Ngi la pynsngew ruh ha ka jingïalang ba ngin ym lah ban pdiang ba yn pyntreikam ïa ka Roster System naduh u snem 1972. Lada pyntreikam naduh u snem 1972 kan sa don beit ka Backlog ka ban long pyrshah ïa ka Reservation Policy jong u snem 1972 kaba la batai shai kdar ba hadien ar snem kan ym don shuh ka Backlog,” u la ong.
“Kano kano ka Backlog kaba mih na kane ka Roster Register ba ka Sorkar ka pynmih ka long kaba be-aiñ bad kan um lah ym ieng,” u la ong bad bynrap, “ngi la ong ba ka Sorkar kam dei ban pyntreikam ïa ka Roster System shadien bad ba kam dei ban don ka Backlog.”
“Lada ka Sorkar ka ong ban pyntreikam ïa ka Roster System shakhmat namarkata ka Roster Account ka dei ban treikam naduh u Zero jong u bnai Jymmang, 2022 bad ïa kiba la ïohkam shadien ngin ym don jingkheiñ shuh,” u la ong bad lada leh da kane ka lynti kan beit bad ka Sorkar ka dei ban kren shai beit kdar.
“Ngim kwah ban kan shu ïalam bakla ïa u paidbah katba haba pyntreikam ïa ka Roster System shakhmat,katba ïa ka Roster Register patde phi buh naduh u snem 1972. Ka jingkren jong ka Sorkar hynin ka sngi ban pyntreikam shakhmat ïa ka Roster System ka dei tang ka jingïalam bakla,” ong u Bah Passah.
Haba ai nuksa, u la ong, “lada peit ïa ki Advertisement kiba la pynmih ka pyni ba ki Garo ki ïoh 11 tylli, 5 tylli ki Khasi bad ka pynpaw shai kdar ba ka 40:40 kam don shuh namarba ki shim ïa ka Backlog.”
“Lada ka Sorkar ka ong ba ka Roster System kan treikam shakhmat ka dei ban pynmih da ka jingpynbna (Notification) kaba shai. Ynda la pynmih ïa ka thup jong ki nongthep kam kiba la shah jied ha ki kam Sorkar nangne shakhmat ngin sa peit ka result ka dei (kaba pyntreikam) shadien lane ka result (kaba pyntreikam) shakhmat,” u la ong.
“Lada ka dei kaba treikam shadien ruh u Khasi u dei ban ïoh katjuh ki post bad u Garo ruh katjuh lada ha kine ki bnai kiba shakhmat lada ki tam ki Garo ka pynpaw shai ba ka jingpyntreikam ka long beit shadien naduh u snem 1972,” u la ong.
Haba kylli, u la ïathuh, “ngi la kren da kaba shai ba katba ka jingïakren ka dang ïaid dei ban pynsangeh shwa ïa ki jingkhot thungkam bad ka Sorkar ruh ka la pdiang ha ka jingïalang bad ka la kular ban sangeh shwa.”
Kum ban shu kdew hangne, ba ka Sorkar ka la thung da ka Komiti ba la khlieh da ka Myntri ka Sorkar Jylla ka Dr. Ampareen Lyngdoh ha kaba ki dkhot kin dei na ki seng saiñpyrthei bapher bapher.