Sngew pyrshah jur u MLA ka Mawlai ïa ka jingdawa baheh ki Harijan

Shillong, Iaiong 26 : U MLA jongka Mawlai Constituency u bah P.T Sawkmie u pynpaw ka jingpyrshah jur halor kane ka jingdawa ba heh jong ki Harijan ban ai jaka ïa ki haduh 10 acre, ban bhah mar 200 Sq Meter bad ban pynshna ïing ïa ki da ka sorkar hapoh European Ward namar u ong ba ka sorkar kam dei ban pdiang ïa kane ka jingdawa kine ki jaidbynriew.
Haba ïakren bad u nongthoh khubor u la ong “ Ka sorkar ka dei ban pyrkhat shwa ïa ki briew lajong namar ki don bun ki long ïing baduk ba kyrduh kiba ym ïoh wat tang ka ïing ruh ban shong ban sah ym ban shu sngap ïa kine namar kine ki la shu shim kabu palat pud bad nga sngewlyngngoh ruh kumno ki nud ban dawa baheh kumne na ka sorkar”.
‘ Nga sngewlyngngoh kumno u nongialam ka Harijan Panchayat Committee (HPC) u Gurjit Singh u nud ban pan bad jaka bad pisa na ka sorkar ban ban pynshna ïing ïa ki haduh 342 tylli hapoh ka European Ward” ong ubah Process.
“ Nga dawa ba ka sorkar kam dei ban sngap satia ïa kane ka jingdawa ba khlem nongrim namar ka la dei ban pyrkhat shwa ïa ki briew lajong ban pynshna ïing ha European Ward namar ki bun bah kiba duk ba kyrduh ki bym don ïing don sem ruh” ong biang u bah Sawkmie.
Lah ban pynkynmaw ba ka sorkar kam pat ai kano kano ka jingmynjur halor kane ka jingdawa namar ka sorkar ruh kan dang shong bishar bniah bha halor kane ka jingdawa. Kan don ka Committee ban peit ïa kane shwa ba kan phah sha ka High Power Committee (HPC) bad kane pat ka Committee kan sa bishar bniah shwa ban phah ïa ka kaiphod sha ka sorkar jylla.
Lah ban pynkynmaw ba na ka liang u Symbud Myntri Rangbah u bah Prestone Tynsong u la kren shai ba ka sorkar kam pat ai kano kano ka jingkular namar kan hap ban shong bishar bniah bha ïa kine ki jingdawa shwa ban shim ïa ka rai kaba khatduh bad khot biang ïa ki nongïalam ki Harijan ban pynsngew hakhmat jongki ïa ki rai jongka sorkar.