Shillong, Ïaïong, 26 Ka Meghalaya’s Talent Search Organisation (MTSO) shen kan sa pynlong ïa ka North East’s Specially Abled Got Talent (India) Season-1 ka rynsan ïakob pyni ïa ki sap ki phong la ka long ha ka rwai ka siaw, ka shad ka tem bad kiwei kiwei. Ïa kane ka rynsan kaba la pynlong kyrpang tang na bynta kito ki briew ba duna dkhot met la kyrshan da ka ophis Social Welfare jong ka East Khasi Hills bad yn pynlong lyngba ka online. Ki nongïashim bynta kin hap ban pynrung kyrteng bad kan don ka Audition Round kaban sdang naduh ka 2 tarik haduh ka 16 tarik Jymmang 2022.
Kan don ruh ka khusnam na bynta ki nongjop kata 15,000 ïa kiba jop nam lahduh, 10,000 ba wan ba ar bad 7,000 ba wan ba lai, bad kin don ruh haduh 7 tylli ki consolation prize ba mar 1,000 tyngka. U Bah Sanat Basaiawmoit uba dei u Chief Adviser jong kane ka seng u la ïathuh ba ka jingpynlong jong ki ïa kane ka rynsan kaba long kyrpang tang na bynta kiba duna dkhot met ka long ban ailad na bynta jong ki ba kin pynpaw pyrthei ïa ki sap ba ki don. U la ïathuh ruh bala ailad ïa ki ban pynpaw pyrthei ha kane ka synran ïa ka sap kaba ki don khlem da donkam ban siew eiei. Ki nongïashim kin hap ban phah ïa ki syrnot jingpynshisha kum ka syrnot sngikha, ka syrnot jingpynshisha ba kidei ki briew ba duna dkhot met bad ka syrnot nongshong shnong ba pura jong ka ri India kiba dei na ka tnaiñ NorthEast.
Ka MTSO kadei kawei na ki kynhun kaba la pynlong ïa kiba bun ki rynsan ïakob pyni sap hapoh ka Jylla kaba la sdang naduh ka Meghalaya’s Got Talent Season-1 haduh Season-4 bad kala pynlong teng ruh ïa ka Meghalaya’s Got Specially Abled Talent Season-1 ha u 2018 ïa kaba la kyrshan da ka tnad Social Welfare ka EKH bad mynta kan wanrah biang ïa kane ka rynsan na ka bynta ki briew ba duna dhot met jong ka thaiñ NorthEast.
