Shillong, Ïaiong 26 : U Myntri Rangbah ka jylla, Conrad K Sangma ha ka sngi Ba-ar u la pynkup burom da ka khusnam ‘Lifetime Achievement Award’ ïa u nongrwai ba pawnam ka jylla u Bah Lou Majaw ha ka jingpyllait paidbah ïa ka rynsan ban kyntiew ïa ka rwai ka siaw ha ka jylla ka “Meghalaya Grassroots Music Project”.
Katei ka projek kadei ka prokram kyrpang jong ka sorkar ban ithuh bad kyntiew ïa ki riew donsap ha ka put ka tem bad ka rwai ka siaw. Lyngba katei ka sienjam ka sorkar kan kyrshan wat ïa ki rynsan rwai ha kylleng ki bynta jong ka jylla khnang ba ki nongrwai kin ïoh ïa ka kabu ban pyni ïa ka sap bad ka jingtbit jong ki. Ym tang katta ka sorkar kan kyrshan ruh ïa ki riew donsap ba kin leit peit nuksa wat na shabar jylla.
Haba kren ha kane ka jingïalang, u Myntri Rangbah u la ong, “Ngi pynwandur ïa kane ka prokram na ka bynta ban pynshlur bad plie ïa ka lad na bynta ki nongrwai ba kin pynïasnoh lang bad ka kam jngohkai pyrthei.”
