Kiew ka jingïap sha ka 54 ngut, ïoh pyllait im 13 hajar ngut
Hadien ba shimti ki Shipai sdang jai jai ha Manipur
![](https://mawphor.com/wp-content/uploads/2023/05/manipur.jpg)
Imphal, Jymmang 06 : Ka jingïaumsnam ka bym pat sangeh ha Manipur ka la nang kyntiew ïa ka jingiap jong ki briew sha ka 54 ngut bad bun ngut ki la mynsaw.
Ka Sorkar Pdeng ka la nang phah ïa ki pyrton shipai sha kane ka Jylla ban pynjur ïa ka jingpahara ha ki jaka kiba ka jingïakynad ka dang bteng. Ki shipai ki la pynlong ruh ïa ki flag march ha kylleng ki jaka ban tehlakam ïa ki nongpynkulmar.
Mynta ka sngi ka jinglong jingman ka la kham jai jai ha Imphal valley bad bun ki dukan bad ki ïew kila sdang ban plie bad ki kali ruh ki la sdang ban mih sha surok.
Kat kum ka jingpyntip ki heh Sorkar, napdeng ki 54 ngut kiba iap, 16 tylli ki met la buh ha ka jaka buh metiap ha Churanchandpur District Hospital, 15 tylli ha Jawaharlal Nehru Institute of Medical Science ha Imphal East District, bad 18 tylli ki don ha Regional Institute of Medical Sciences (RIMS) ha Imphal.
Kiba bun ki dukan bad ki ïew ha sor Imphal bad kiwei ki jaka ki la plie hynne ka step sngi saitjaiñ ha kaba ki briew ruh ki la ïamih ban ïathied ïapet ïa ki marbam mardih, ki jhur hapdeng ka jingpahara kaba jur jong ki shipai.
Kat kum ka khubor, haduh 5 ngut ki kaikhlaw ki la shah siat iap bad arngut ki shipai Indian Reserve Battalion ki la mynsaw ha ka jingïather kuli ha Churachandpur District.
“Haduh 13000 ngut ki briew la ïoh ban ïarap bad pynkynriah sha ki jaka rieh ba shngaiñ, katto katne ha ki ktem jong ki shipai ïa kiba la wanrah na Churachandpur, Moreh, Kakching bad Kangpokpi districts” ong u Nongaiktien ki shipai.
Palat 600 ngut ki briew na Manipur kila leit rieh sha Cachar District ka Jylla Assam.
Hadien ka jingwanrah ïa ki shipai ban pahara ha kylleng ki jaka, ka jinglong jingman ha Churachandpur, KPI Moreh bad Kakching ki la kham jai jai mynta.
“Namar ka jingkloi ban shimkhia da ki shipai, ka Churachandpur, KPI, Moreh bad Kakching kila don mynta ha ka jingpyn ïaid jong ki shipai bad ym shym la don shuh kano kano ka jingkulmar kaba jur naduh ka miet sngi palei” ong ki shipai.
“Haduh 13000 ngut ki nongshongshnong la lah ban ai jingïarap bad kine ki la sah ha ki jaka ba la pynbeit shipor ha ki jaka jong ki shipai” ki la pyntip.
Ki shipai ki la pyntip ruh ba ha kine ki 12 kynta (step sngi Thohdieng haduh janmiet), ka Imphal East bad West District kila sakhi ïa ki jingjia wiangding bad ki jingpyrshang jong ki riew shim kabu ban pakhang ïa ka surok”.
U Myntri kam Pohïing ka Ri Amit Shah ula peitngor bad buddien bha ïa ka jinglong jingman ha Manipur.
U Amit Shah ula pynlong haduh artylli ki jingïalang bad u Myntri Rangbah ka Manipur u Biren Singh lem bad ki Heh Ophisar ka Jylla lyngba ka video conferencing bad ula shongbishar halor ka jinglong jingman ka suk ka saiñ hapoh kane ka Jylla.
Ha kajuh ka por, ka Sorkar pdeng kala nang phah ïa ki pyrton shipai sha Manipur ban pynkhlaiñ shuh shuh ïa ka jingpahara ha kaban lah tehlakam ïa ka jingpur ka jingïakynad pher Jaidbynriew.