Shillong, Iaiong 24 : Shwa ka jingrakhe ïa ka Ramadan-ul- Mubarak, u myntri ka sorkar jylla bad MLA ka South Shillong Constituency u bah Sanbor Shullai ula leit ban ai khublei kitbok ïa ki paid Muslim ha ka Madina Masjid, Jhalupara bad ai ruh ka jingïakren sha ki mynta ka sngi.
Ha katei ka jingkren ula ai khublei ïa ki paid Muslim kiba la ai ka jingkyrshan ïa u naduh u 2008 ba un jop ïa ka election MLA ha ka sien ba nyngkong eh. U la ong ba u juh u jan bha bad ki paid Muslim namar man la ka Muharram u ju ïa synran lang ïa ki paid Muslim na Laban shaduh Jhalupara bad mynta baroh kine ki jaka ki hap ha kajuh ka constituency. U la kular ban pynneh pynsah beit ïa ka shongsuk shongsaiñ bad jingïasngewjan para briew bad baroh ki jaidbynriew la ki dei na kano kano ka jait ruh kam dei ban don ka jingsngew ïapher hynrei ban ïalong kawei hapoh ka constituency.
U la kyntu ruh ïa ki paid Muslim ban buh ha ki jingduwai ban ïoh ïa ka mynsiem jingïalong kawei ha une u bnai ba leh niam Ramzan bad to ai ba ka jingsuk kan ym long tang ha kane ka nongbah hynrei ha baroh kawei ka jylla.
Haba kren ha ka jingïalang u General Secretary ka North East Muslim Union u Md Zakaria u la ong “ Ka jingtrei jong u bah Sanbor ha ka Constituency ka long kum ka jingkyrkhu ïa ki paidbah bad u la kyntu ïa ki paid Muslim ban dang bteng ban ai ka jingkyrshan ba pura ïa u bah Sanbor ïa kane ka jingleh bha bad ban dang ïai leh bha jongu ïa ka constituency bad ïa baroh ki jaidbynriew kiba don hapoh jongka”.
