Shillong, ïaïong, 22: Katba nang mih ki sngi, ki nongdie madan ha Police Bazar ki la nang mih bad nang jyllei haduh katta katta, ym tang ki trai jylla kiba shong die madan hynrei la sakhi ruh ba wat ki bar jylla ki la nang kharoi bha ban shong die madan harud surok ha Khyndai Lad kaba long ka kad khaii kaba heh ha Sor Shillong kaba ju thnem manla ka sngi da ki nongleit nongwan, ki nongthied nongpet.
Nalor kata, ka jingai jingbit jong ka Shillong Traffic Police ïa ki kali saw shaka bad ïa ki thuk thuk ar shaka ban ïaid lyngba napdeng surok Police Bazar ka la nang pynwit shuh shuh ïa ki paidbah nongleit nongwan hadien ba u Myntri ka tnat Jngohkai Pyrthei u Bah Paul Lyngdoh dang shen ha ka jingleit jurip ïa kane ka iew, u la pynpaw ïa ka jingsngew ba la i donkam ban ym shah shuh ban ailad ïa ki kali saw shaka bad ïa ki thuk thuk ar shaka ban ïaid lyngba napdeng kane ka iew.
Ka kynhun ki lad pathai khubor ha ka jingïakren bad ka President jong ka Meghalaya & Greater Shillong Progressive Hawkers & Street Vendors Association (MGSPHSVA) ka Kong Biolin Pyrtuh ka la ong ba kum ki nongdie madan ki sngewïahap ban khang ïa ka jingïaid kali napdeng ka iew namarba ki bun ki paidbah kiba ïaid lynti ki ju ngat ha ki jingmynsaw na ka jingtyngkhuh bad ki kali bad ha kajuh ka por ka la ong ba ki nongdie madan kim sngew ïahap ïa ka jingthmu jong ka Sorkar ban pynkynriah ïa ki nongdie madan na kane ka jaka kaba ki ju im kamai jakpoh manla ka sngi.
