Shillong, Ïaïong 24: Kiba bun ki nongïalehkai table tennis kynsai kila khyllem nh na ka 83rd Senior National Table Tennis Championship kaba dang ïaid shaphrang ha Indoor Stadium, SAI, bad ka Manika Batra kadei kawei napdeng ki nongïalehkai kynsai kaba la khyllem noh na kane ka lympung.
Katei ka lahduh kala khyllem noh hadien ba kala rem ha ka jingïakhun Round of 32 ha ka Ayhika Mukherjee jong ka RBI.
Ka Ayhika kala lamkhmat da 3 sien bad donkam satang ar point ban jop ha ka jingïakhun kaba bud. Hynrei, ka Manika, kaba mihkhmat na ka Petroleum Sports Promotion Board, kala ïakhun tyngeh bad pynïakhaid da 3-3.
Ka Manika kaba dei kawei na ki khlur ïalehkai table tennis ka ri India kala ïakhun tyngeh bad kala ïoh ruh ki kabu ban pynphai kylliang ha ka liang ka khur point. Hynrei ha kane ka khyllipmat, dei ka Ayhika kaba la lah ban pynliem lyndang syndon ïa ka na kane ka lympung. Kala jop ha ka jingïalehkai ba hynñiew sien kata da 11-3.
Haba phai pat sha u Akash Pal bad Prapti Sen jong ka Railways Sports Promotion Board kila jop ha ka jingïakhun final (mixed doubles) da 3-1 pyrshah ïa ki shijur ki nongïalehkai jong ka Haryana u Soumyajit Ghosh bad Suhana Saini.
Ka Mouma Das ba la 38 snem ka rta kaba khur lahduh san sien ha ka National kala rung sha ka quarterfinal hadien ba kala pynliem noh da 4-3 pyrshah ïa ka Diya Chitale ha ka jingïakhun ba para marwei jong ki kynthei.
U Prapti Sen ruh u khlem poi sha ka thong hadien. U Archana Kamath u la rem noh hakhmat u Yashini Sivashankar jong ka Tamil Nadu, da kaba rem da 4-3 ha ka Round of 32.
Kiwei pat ki nongïalehkai kynsai kiba la khyllem noh na kane ka lympung ki kynthup ïa u Harmeet Desai, SFR Snehit, Sudhanshu Grover, Ronit Bhanja, Anthony Amalraj bad Deepit Patil.
U Aadarsh Om Chhetri uba ïalehkai na bynta ka Delhi u la rem noh ha u G Sathiyan da 4-0 ha ka Round of 32.
U Chhetri, udei tynrai na Laimer, Upper Shillong, u la shong la sah ha Meghalaya haduh ba un da pule klas 4 shwa ba un mih noh na ka jylla ban leit pyntbit shuh shuh ha ka kam ïalehkai table tennis bad mynta u mihkhmat ïa ka Delhi.
