Nongpoh, Ïaiong 22: Da ka jingangnud ban kyntiew ïaka rukom sumar tynrai bad ki rukom ai dawai tynrai, u District Planning Officer, Ri-Bhoi District u la pyntip ba ka tnad Planning jong ka sorkar jylla lyngba ka Bio-Resources Development Centre haka jingïatreilang bad ka Ri-Bhoi Traditional Healers Association kin sa plie da ka jaka sumar tynrai ne ka Meghalaya Traditional Health Clinic haka shnong Pahamsyiem ha Nongpoh.
Lyngba katei ka jaka sumar tynrai kan kyntiew ïaki nongsumar tynrai haka jylla kiba ju sumar da ki dawai kynbat bad kiwei kiwei kaba long ruh kum ka jingplie lad ïaki bad ka rukom sumar tynrai haka jylla lyngba ki jinghikai bapher baper ban sa pynphriang lyngba katei ka clinic.
