“Ka jingkoit jingkhiah ka dei ka spah bah nga shim khia ban ïarap ïa ki paidbah” : Banteidor

Shillong, Iaiong 22 : “ Ka jingkoit jingkhiah ka dei ka spah bah namar kam myntoi ban shong halor ka spah lada ym don ka jingkoit jingkhiah ha ka met ka phad bad dei na kata ka daw nga pyrshang ban kyntiew ïa ka koit ka khiah hapoh ka Mawkynrew Constituency” ong u MLA ka Constituency bad Myntri ka tnad Sport bad kam rep kam riang u bah Banteidor Lyngdoh.
U bah Banteidor u la long kum u kongsan ha ka jingplie ïa ka Health Mela mynta ka sngi ha Holy Cross Higher Secondary School, Mawkynrew ba la pynbeit da ka National Health Mission, Meghalaya ha ka jingïatreilang ryngkat ka ophis DMHO, East Khasi Hills lem ka ophis BDO Mawkynrew C&RD Block bad ka Mawkynrew Block Programme Management Unit (NHM), Mawkynrew PHC.
Kane ka prokram ka la long ka jingmyntoi ïa ki paidbah nongshong na ki phew tylli ki shnong ha ka thaiñ Mawkynrew. Ha kane ka sngi la ïadon lang ruh da u BDO ka Mawkynrew Block, Bah LT Tariang, ki Doctor ba dei peit ïa ka Mawkynrew PHC bad Jongksha PHC, ki nongtrei ka tnad Health, ki khynnah skul, ki nonghikai, ki nongtrei ASHA bad Anganwadi, ki nongshong shnong nalor ki bor pyniaid ka Holy Cross School bad kiwei pat.
Ki prokram ai jinghikai kiba dei ïa ki longkmie ba armet kumno kin sumar ïalade bad i khunlung, ka jingïada na ka jingpang Cancer, ka jingïada na ka jingpang Anaemia, ka jingshim dawai wieh, ka jinghikai ban kiar na ka jingarmet dang khynnah ka rta, ka jingai snam bad kiwei kiwei pat nalor ka jinghikai kilan met la ai sha ki khynnah bad ki nongshong shnong. U bah Banteidor u la ong “ Namar ba nga tip ba ka jingkoit jingkhiah ka long ka spah bah, na kata ka daw nga pyrshang ban kyntiew kyrdan ïa ki jaka sumar kum ïa ka Jongksha PHC , ïa ka Thynroit Sub Centre sha ka PHC, ïa ki Sub Centre ha Nongjrong, Laitkyrhong bad yn dang ïai wanrah shuh shuh ïa ki jaka sumar khnang ba ki paidbah kin suk bad jan ban leit wad jingsumar bad shim dawai ha kano kano ka por”
“ Kum u nongmihkhmat jong phi ki paid ka Mawkynrew Constituency ngan ïai wanrah ki jingkyntiew bad pynroi pynpar ïa ka constituency ha baroh ki liang namar nga kwah ba kan long ka Model Constituency ïa kiwei. Ngi la ïoh ruh ïa ka Block Office kaba thymmai kaba 3 acre bad dang don bun ki jingpynroi pynpar ki ban dang wanrah hapoh ka constituency” ong biang u ban Banteidor.
Shuh shuh u la ai khublei ïa ka tnad ka tnad ka koit ka khiah bad ïa ka ophis BDO kiba la wan lam ïa kane ka Health Mela na ka bynta ka jingmyntoi ki paidbah nongshong.
Halor ka jingwan poi bun ngut ki nongshong shnong, u la ban jur halor ka jingdonkam ban pynlong ïa ki prokram ai jinghikai ryngkat ki jingkyntu ïa ki paidbah ban wan sha khmat ban shim khia na ka bynta ka koit ka khiah.
Haba kdew ïa ka jingbym pat biang pura ki lad ai jingsumar ha ka thaiñ, u Bah Banteidor u la ai khublei ruh ïa ka jingtrei shitom ki nongtrei ASHA bad Anganwadi khamtam ha ka por ka jingwan lynshop ka khlam COVID-19.
U BDO ka Mawkynrew Block u bah L.T Tariang ula long u symbud kongsan bad la pynïaid ïa ka jingïalang da i Dr I Syiem, Block Medical and Health Officer iba la ai ruh ïa ka jingkren pdiang sngewbha.Kiwei kiwei kiba la ai jingkren ki long Dr E Kharmutee, District Maternal and Child Health Officer, Dr S Khonglah Addl. District Medical and Health Officer bad kren ai khublei da i Dr A.K Nongbri Medical and Health Officer ba dei peit ïa ka Jongksha PHC.
La pynphuh pynphieng ruh ïa ka sngi da ka jingshad na ki dkhot SHG ka Mawkynrew, ka jingpyni sap ïa ka Yoga bad Zumba da ki dkhot ka MLHPS Mawkynrew Block. La ïadon lang ruh ki Nonghikai, Principal bad ki khynnah skul ha kane ka sngi.