Shillong, Ïaiong 22: U Lat ka Jylla Satya Pal Malik ula pynhap ïa ka Meghalaya Residents Safety and Security (Amendment) Bill 2020 ha ka thup kaba donkam ban ïoh jingbit na u President ka Ri India.
“Ka Bill ka dang ap ban ïoh ïa ka jingbit na u President ka Ri India” ong u Malik haba ïakren bad ki nongthoh khubor hynne ka sngi thohdieng haba pyntip ba na ka liang ka jong u, ula dep pynphai ïa ka MRSSAB 2020 sha ka Sorkar Jylla ba kan leh ïa kaba donkam.
Ka MRSSAB ka dei ka Bill bala mynjur da ka Ïingdorbar Thaw Aiñ ka Jylla ha ka 19 tarik Lber 2020 bad ka jing thmu jong kane ka Bill ka long ban buh kyndon ïa ka jingrung ki briew sha Jylla bad ka jingsahwai hapoh ka Jylla.
Ka khubor ka ïathuh ba mynta ka dei ka kamram jong ka Sorkar Jylla ban phah biang ïa kane ka Bill sha ka Sorkar Pdeng ban ïoh jingbit na u President ka Ri.
“U Lat ka Jylla ula twad jingmut na ki riew said Aiñ bapher bapher bad halor kane, ula pyndonkam ïala ka jong ka jingstad. Ula thoh ha ka Boll ba ka hap hapoh ka thup jong ki Bill ba dei ban ïoh jingbit na u President ka Ri India. U Lat ula pynsngew ba kam hap satia ha ka bor jong u ban mynjur ïa ka Bill, kaba thmu ban khang ïa ki briew na kiwei pat ki jaka jong ka Ri ba kin wan sha Meghalaya. Namar kata, kum kane ka bor ka shong satang ha u President ka Ri India” la ong ka khubor.
Lah ban kdew hangne ba ka MRSSAB, 2020 ka ban jur ïa ka jingpyndonkam ban pynshisha bad buh kyndon ïa ka jingwan rung ki briew sha Meghalaya bad teh kyndon ruh ïa ki nongshongwai ha kino kino ki jaka hapoh ka Jylla.
Kat kum kane ka Bill la ong ba baroh ki briew kiba kwah ban shong ban shong ha Meghalaya ïa palat 48 kynta ki dei ban ai lut ïa ki jingtip kat kum bala pruid dak ha ka Rules.
