Williamnagar, Ïaiong, 12: Ka Janata Dal United (JDU) Meghalaya, ha ka sngi Ba-ar ka la beh seng ïa ki arngut ki nongïalam jong ka namar ki kam pyrshah party jong ki ha kane ka elekshon kaba dang shudep.
Ki arngut ki nongïalam kiba ka JD(U) ka la beh seng ki kynthup ïa u Cyril D. Marak u ka Meghalaya Janata Dal United bad u Nehru T. Sangma uba dei uwei na ki State Executive Member jong ka party.
“Ka jingbeh seng jong ngi ïa u Cyril D. Marak ka dei namar u la ïalam bakla ïa ki nongkyrshan ka party da kaba kynnoh ba ki laingut ki kyrtong ka party ki la shim ïa ka pisa na ka party hynrei ki khlem ai pat sha ki nongtrei bad kane ka jingkren jong u ka long kaba lamler bad ha ka jingshisha dei ma u ba leit die ïa lade sha kiwei pat ki kyrtong,” ong u Robinus T. Sangma u Convenor ka JDU Meghalaya.
Shuh shuh u la ong ba ka jingbeh noh pat ïa u Nehru T Sangma ka dei namar ha kane ka elekshon u la leit ban die ïa lade sha kiwei pat ki kyrtong da kaba ïalam bakla ïa ki nongtrei ka party da ki jingkynnoh ba laiphew jait ïa ki kyrtong ka party.
